काठमाडौं । लामो समय कोरोना संक्रमण नदेखिएको सुदूरपश्चिममा शुक्रबार ५ जना संक्रमति भेटिएका छन् । सुदूरपश्चिमका ५ जनासहित शुक्रबार दिउँसो थप २० जनामा कोरोना भाइरस संक्रमण पुष्टि भएको हो । यसअघि आज विहान ३० जनामा संक्रमण पुष्टि भएको थियो ।
शुक्रबार स्वास्थ्य तथा जनसंख्या मन्त्रालयको नियमित प्रेस ब्रिफिङमा मन्त्रालयका प्रवक्ता विकास देवकोटाले थप २० जनामा संक्रमण पुष्टि भएको जानकारी दिनुभयो ।
कैलालीका १९, २३, र २९ वर्षीय पुरुष, डडेल्घुराका २५ वर्षीय पुरुष, बैतडीका २२ वर्षीया पुरुष गरी सुदूरपश्चिम प्रदेशका ५ जनामा कोरोना संक्रमण पुष्टि भएको हो ।
सुदूरपश्चिममा यसअघि पाँच जना संक्रमित भेटिएकोमा सबै निको भएर घर फर्किसकेका छन् । ३६ दिनपछि सुदूरपश्चिममा फेरि संक्रमण देखिएको हो ।
त्यसैगरी बाँकेका १४ जना, र मोरङका एक जनामा पनि संक्रमण पुष्टि भएको छ । योसँगै नेपालमा कोरोना संक्रमितको संख्या ५०७ पुगेको छ ।
बैतडीका संक्रमित जिप्रकामा थुनुवा
बैतडीमा कोरोना संक्रमित भेटिएका पुरुष प्रहरी हिरासतमा रहेका थुनुवामा रहेको बुझिएको छ । जिल्ला प्रहरी कार्यालयको हिरासतमा रहेका ति थुनुवामा संक्रमण देखिएको हो ।
भारतबाट चैत ६ गते नेपाल आएका उनी कर्तव्य ज्यानको मुद्दामा वैशाख १५ गते पक्राउ परेका हुन् । थुनुवामा कोरोना संक्रमण देखिएपछि जिल्ला प्रहरी कार्यालय सिल गरिएको छ ।
