काठमाडौं । रुपन्देहीको क्रिमसन अस्पतालमा उपचाररत गुल्मीका कोरोना संक्रमित पुरुषको मृत्यु भएको छ ।
भेन्टिलेटरमा उपचाररत गुल्मीको मदाने गाउँपालिका–६ का ४१ वर्षीय प्रधानअध्यापकको बिहीबार बिहान मृत्यु भएको अस्पताल विकास तथा चिकित्सा सेवा महाशाखा प्रमुख डा. उमाशंकर चौधरीले पुष्टि गरेका छन् ।
गत जेठ १ गते उनी अस्पतालमा भर्ना भएका थिए भने २ गते उनको स्वाब परीक्षणमा कोरोना संक्रमण देखिएको प्रादेशिक जनस्वास्थ्य प्रयोगशाला भैरहवाले पुष्टि गरेको थियो ।
अर्घाखाँचीको एक मेडिकलमा चेकजाँचपछि रुपन्देहीको मणिग्राममा रहेको क्रिमशन अस्पतालमा उपचारत थिए ।
उनको स्वास्थ्य अवस्था नाजुक भएका कारण अस्पतालको भेन्टिलेटरमा राखेर उपचार भइरहेको थियो ।
यो कोरोनाबाट नेपालमा भएको तेस्रो मृत्यु हो । यसअघि सिन्धुपाल्चोक बाह्रबिसेकी सुत्केरी र बाँके नरैनापुरका युवकको कोरानाबाट मृत्यु भइसकेको छ ।
हालसम्म नेपालमा कोरोना संक्रमतिको संख्या भने ४४४ पुगेको छ । जसमा ४५ जना निको भएर घर फर्किएका छन् ।
