बुटवल । संघीयताविरुद्ध संघर्ष गर्दै आएको राष्ट्रिय जनमोर्चाले काठमाडौं केन्द्रित आन्दोलनको घोषणा गरेको छ ।
बुटवलमा सम्पन्न राजमोको राष्ट्रिय परिषद बैठकले सप्ताहब्यापी काठमाडौं केन्द्रित आन्दोलन गर्ने निर्णय गरेको महासचिव मनोज भट्टले जानकारी दिनुभयो ।
जनआन्दोलन दिवसको अवसर पारेर आगामी चैत २४ गते काठमाडौंमा संघीयता खारेजीको आन्दोलन सुरु हुने महासचिव भट्टले बताउनुभयो ।
सो आन्दोलन चैत ३० सम्म सञ्चालन हुने छ ।
राष्ट्रिय जनमोर्चाले प्रादेशिक संरचनाका कारण विकास खर्च कटौती गरेर प्रदेशका मन्त्री, सांसद पाल्नुपरेको, जनताले अनावश्यक करको बोझ बोक्नुपरेको, वैदेशिक ऋण बढेको, राष्ट्रियता तथा अखण्डतामाथि खतरा बढेको, राष्ट्रिय एकतामा खलल पुगेको तथा केन्द्रको विकृत राजनीति देशका सात ठाउँमा विकेन्द्रित भएको निष्कर्षसहित संघीयता खारेज गर्नुपर्नेमा जोड दिएको हो ।
संघीयताको विकल्पमा प्रजातान्त्रिक विकेन्द्रियतासहितको एकात्मक राज्य हुनुपर्ने धारणा अघि सारेको छ । राजमोले स्थानीय तहलाई थप अधिकार सम्पन्न बनाउनुपर्नेमा जोड दिएको छ ।
शुक्रबार र शनिबार गरी दुई दिनसम्म चलेको राष्ट्रिय परिषद बैठकले अध्यक्ष चित्रबहादुर केसीले प्रस्तुत गरेको राजनीतिक प्रतिवेदन पारित गर्नुका साथै आर्थिक, सांगठनिक प्रतिवेदन र कार्यक्रमसम्बन्धी प्रस्ताव पारित गरेको छ ।
बैठकको उद्घाटन शुक्रबार अध्यक्ष केसीले गर्नुभएको थियो ।
- राष्ट्रिय जनमोर्चाको राष्ट्रिय परिषद बैठक सुरु
- राष्ट्रिय जनमोर्चाको राष्ट्रिय परिषदमा राजनीतिक प्रतिवेदन पेस
