बुटवल । राष्ट्रिय जनमोर्चाको दोस्रो राष्ट्रिय परिषद बैठक बुटवलमा सुरु भएको छ ।
‘गणतन्त्र र राष्ट्रियताको रक्षा गारौँ, संघीयता खारेज गरौँ’ भन्ने नाराका साथ सुरु भएको राष्ट्रिय परिषद बैठकको शुक्रबार अध्यक्ष चित्रबहादुर केसीले उद्घाटन गर्नुभयो ।
उद्घाटनका क्रममा अध्यक्ष केसीले नेपाली जनताले दशकौंदेखि संघर्ष गरेर ल्याएको लोकतन्त्र र गणतन्त्रमाथि कालो बादल लागेको बताउनुभयो । उहाँले गणतन्त्रका लागि लडेकै शासकहरूबाट गणतन्त्र खतरामा रहेको दाहोर्याउनुभयो ।
अध्यक्ष केसीले खाडीको ४५–५० डिग्रीको तातोमा काम गर्ने नेपालीले पठाएको रेमिटेन्सबाट नेपालमा आठवटा सरकार, दर्जनौं मन्त्री र सयौं सांसदहरूले मोजमस्ती गरेको बताउनुभयो । केसीले संघीयता अब देशले धान्नै नसक्ने अवस्थामा पुगेको बताउनुभयो ।
दुईदिनसम्म चल्ने राष्ट्रिय परिषद बैठकमा देशभरबाट करिब तीनसय जनाको सहभागिता रहेको छ ।
बैठकको उद्घाटन समारोहमा विभिन्न जनवर्गीय संगठनका नेताहरूले शुभकामना दिने क्रम जारी छ ।
