काठमाडौं । सरकारले लकडाउन जेठ ५ गतेसम्म थप गर्ने निर्णय गरेको छ । बुधबार बसेको मन्त्रिपरिषद बैठकले लकडाउनको अवधि १० दिन थप गरेको हो ।
यस्तै, अन्तर्राष्ट्रिय उडान र सीमानाका जेड १८ गतेसम्म बन्द गर्ने निर्णय गरिएको छ । बुधबार प्रधानमन्त्री निवास बालुवाटारमा बसेका मन्त्रिपरिषद्को बैठकले अन्तर्राष्ट्रिय रुपमै कोरोनाको महामारी बढीरहेको भन्दै बाह्य क्षेत्रबाट हुने खतरा रोक्न लागि अन्तर्राष्ट्रिय उडान र सीमानाका बन्द गर्ने निर्णय गरेको मन्त्रिपरिषद स्रोतले बताएको छ ।
पछिल्लो समय छिमेकी मुलुक भारतमा कोरोना संक्रमितको संख्या बढ्दै गएपछि नेपाल–भारत आवतजावतमा दुईतर्फी रोक लगाइएको थियो । सरकारले यसलाई निरन्तरता दिएर अगाडि बढ्ने निर्णय गरेको हो ।
कोरोना भाइरस संक्रमण नियन्त्रणका लागि सरकारले जारी गरेको लक डाउनको आज ४४ दिन पुगेको छ । नेपालमा कोरोना संक्रमण देखिन थालेपछि सकारले चैत ११ गतेबाट सुरु हुनेगरी पहिलो पटक लक डाउनको घोषणा गरेको थियो ।
लक डाउनका कारण अत्यावश्यक, मालबाहक र पासबाहक सवारी मात्रै सञ्चालनमा रहेका छन् । लामो समयदेखिको लक डाउनका कारणल दैनिक ज्यालादारी गर्ने मजदुरहरुलाई भने समस्या भएको छ । स्थानीय तहहरुले राहत वितरण गरिरहेपनि त्यो पर्याप्त देखिँदैन् ।
लक डाउनको समयमा अत्यावश्यक कामबाहेक बाहिर ननिस्किन सरकारले आग्रह गरेपनि भिडि सडक, तरकारी तथा दैनिक उपभोग्यका पसलहरुमा भिड देखिन्छ । लक डाउनसँगै सामाजिक दुरी कायम गर्नुपर्ने भएपनि धेरै तरकारी पसल र दैनिक उपभोग्यका पसलहरुमा यसको प्रयोग भएको पाइदैन् । लक डाउनकै कारण शैक्षिक संस्थाहरु पनि सञ्चालनमा आउन सकेका छैनन् । प्रहरीले लक डाउन उलंघन गर्नेलाई कारवाही गरिरहेको छ ।
