घोराही (दाङ) । आर्थिक वर्ष २०८०/८१ मा सञ्चालन खर्च धान्न नसकेर दाङमा आठ सय ७७ ओटा व्यावसायिक फर्म बन्द भएका छन् । व्यवसाय बन्द गर्ने र खोल्नेको सङ्ख्या समान छ ।
घरेलु तथा साना उद्योग कार्यालयमा उत्पादनमूलक, कृषि तथा वनजन्य, ऊर्जामूलक, खनिज जन्य, निर्माण उद्योग, सेवामूलक र सूचना तथा प्रविधिसम्बन्धी उद्योग दर्ता भएका छन् । नयाँ दर्ता गर्नेको सङ्ख्या र बन्द गराउनेको सङ्ख्या उस्तै रहेको घरेलु तथा साना उद्योग कार्यालयका प्रमुख सन्तोषकुमार सुवेदीले बताउनुभयो ।
दर्ता भएका उद्योगमध्ये कृषि तथा वनजन्यमा वृद्धि भएको उहाँले बताउनुभयो ।
यता, सञ्चालन घाटा भएपछि उद्योगको लगत कट्टा गर्नुपरेको व्यवसायीले बताएका छन् । यो अवधिमा चार सय ७१ ओटा उद्योग बन्द भएका छन् ।
समीक्षा अवधिमा पाँच सय ९६ ओटा फर्म दर्ता भएकामा पाँच सय ९२ ओटा निजी र चारओटा साझेदारी फर्म छन् । एक हजार चार सय ५७ ओटा फर्मको नवीकरण भएको छभने दुई सय ९२ ओटाले पुँजी वृद्धि गरेका छन् ।
एक वर्षमा पाँच सय १३ ओटा उद्योग थपिएका छन् । थपिएका उद्योगमा पाँच सय ४८ जना नयाँ उद्यममा दत्तचित्त भएर लागेका छन्भने एक हजार पाँच सय ६२ जनाले रोजगारी प्राप्त गरेका घरेलु तथा साना उद्योग कार्यालयले जनाएको छ । एक हजार एक सय ५६ ओटा उद्योगले नवीकरण भएका छन् ।
यो अवधिमा उत्पादनमूलक उद्योग ९८ ओटा थपिएका छन् । कृषि तथा वनजन्य उद्योग दुई सय ३१ ओटा थपिएका छन् । पर्यटन उद्योगतर्फ ६१ ओटा थपिएका छन् । सेवामूलक उद्योगको सङ्ख्या एक सय २३ पुगेको छ । (रासस)
