काठमाडौं । राष्ट्रिय जनमोर्चाले भारतका विभिन्न स्थानका क्वारेन्टिनमा नेपाल आउन पर्खिबसेका नेपालीहरुलाई छिटो घर ल्याउन आग्रह गरेको छ ।

रुपन्देहीको सिमावर्ती नौतनवाको क्वारेन्टिनमा बसेका ३३५ नेपालीलाई शुक्रबार र शनिबार गरी घर ल्याइएकोमा धन्यवाद दिँदै राजमोले अन्य स्थानमा रहेका नेपालीलाई पनि स्वास्थ्य परीक्षणको व्यवस्था गरी नेपाल ल्याउन माग गरेको हो ।

राजमोका उपाध्यक्ष एवं प्रवक्ता दुर्गा पौडेलले शनिबार एक वक्तव्य प्रकाशित गरी दार्चुलाको सिमावर्ती क्षेत्रलगायतका स्थानबाट पनि नेपालीहरुलाई आवश्यक व्यवस्थासहित नेपाल ल्याउन आग्रह गर्नुभएको छ ।

यस्तो छ, वक्तव्यः
‘नौतनहवाको क्बारेनटाइनमा राखिएका ३३५ जना नेपालीहरू मध्ये १०० जनालाई हिजो र बाँकीलाई आज नेपालमा ल्याएर उनीहरूलाई सम्बन्धित जिल्लाहरूमा पठाउने काम भएको छ । त्यसका लागि हामीले नेपाल सरकार र पाँच नम्बर सरकारलाई समेत धन्यवाद दिन चाहन्छौँ । त्यसका साथै नेपालमा क्बारेनटाइनमा राखिएका १६५ जना भारतीयहरूलाई पनि भारतमा पठाउने काम भएको छ ।

हामीले आशा गर्दछौँ । दार्चुलासहित अन्य भारतीय सीमामा क्वारेन्टिनमा राखिएका नेपालीहरूलाई पनि उद्दार गरी नेपालमा ल्याउनका लागि हामीले सरकार र सम्बन्धित प्रदेश सरकारहरूसित अनुरोध गर्दछौँ ।

भारतीय सीमामा बाँकी रहेका नेपालीहरूलाई नेपालमा ल्याउँदा कोरोना भाइरसको समस्या गम्भीर हुने छ भन्ने हामीलाई लाग्दैन । उनीहरूलाई अनियन्त्रित प्रकारले फुकुवा गरी नेपालमा ल्याउने होइन, तर उनको स्वास्थ्यको परीक्षण गरी नेपालमा ल्याउनुपर्दछ र कोरोना भाइरसको शंका देखिएका व्यक्तिहरूलाई सम्बन्धित जिल्ला वा गाउँपालिकाहरूका क्वारेन्टिनमा र कुनै संक्रमण नदेखिएका मानिसहरूलाई होम क्वारेन्टिनमा बस्ने गरी उनीहरूका गाउँगाउँमा पठाउन सकिने छ ।

त्यसै गरेर राजधानी वा अन्य स्थानहरूमा व्यवहारिक वाध्यताका कारणले अप्ठ्यारोमा परी रोकिएका नेपालीहरूलाई पनि आफ्नो गाउँघरमा जानका लागि आवश्यक यातायात समेतको व्यवस्था गर्न हामीले सरकारसित अनुरोध गर्दछौँ । उनीहरूलाई पनि आवश्यक स्वास्थ्य जाँच गरी कोरोना भाइरसको शंका देखिएकाहरूलाई सम्बन्धित जिल्ला गाउँपालिकाका क्वारेन्टिनहरूमा राख्ने र त्यस्तो कुनै शङ्का नभएका मानिसहरूलाई होम क्वारेन्टिनमा बस्ने गरी पठाउन सकिने छ ।

हामीहरूको के मूल्यांकन छ भने भारतको सीमामा रोकिएका वा राजधानी र नेपालका विभिन्न स्थानहरूमा रोकिएर बसेका मध्ये धेरैजसोमा कोरोना भाइरसको संक्रमण नभएको नै बढी सम्भावना छ । अहिलेसम्म विभिन्न स्थानहरूमा गरिएको स्वास्थ्य परीक्षणबाट त्यो कुरा प्रष्ट हुँदै आएको छ । त्यसकारण उनीहरूलाई भारतीय सीमाबाट नेपाल ल्याउँदा वा राजधानी र विभिन्न स्थानहरूमा रोकेर बसेका नेपालीहरूलाई आ–आपनो ठाउँमा पठाउँदा कोरोना भाइरसको समस्याले गम्भीर रूप लिने छैन भन्ने कुराको आशा गर्न सकिन्छ ।

अन्तमा हामीले उक्त विषयहरूमा तुरुन्त आवश्यक व्यवस्था गर्नका लागि सरकार र सम्बन्धित प्रदेश सरकारहरूसित अनुरोध गर्दछौँ ।’