काठमाडौं । उदयपुरमा मंगलबार ११ जनामा कोरोना संक्रमण पुष्टि भएपछि जिल्ला सील गर्ने निर्णय गरिएको छ । प्रदेशको आन्तरिक सुरक्षा मन्त्रालयमा आज बसेको बैठकले उदयपुरलाई सील गर्ने निर्णय गरेको हो।
स्वास्थ्य तथा जनसंख्या मन्त्रालयले उदयपुरमा मंगलवार एकैदिन ११ जनामा कोरोना भाइरस संक्रमण पुष्टि भएको जनाएको छ । कोशी अस्पतालमा पोजेटिभ देखिएका बिरामीको राष्ट्रिय जनस्वास्थ्य प्रयोगशाला काठमाडौं र बीपी कोइराला स्वास्थ्य विज्ञान प्रतिष्ठान धरानमा पुनः परीक्षण गर्दा मंगलवार ११ जनामा कोरोना पुष्टि भएको हो । धरानमा ८ जना र काठमाडौंमा ३ जनामा कोरोना पुष्टि भएको मन्त्रालयले जनाएको छ ।
यसअघि उदयपुरमा १२ जनामा कोरोना संक्रमण पुष्टि भइसकेको छ । उदयपुरको मस्जिदमा भेटिएका १२ जना कोरोना संक्रमितको सम्पर्कमा आएका व्यक्तिको स्वाब नमूना परीक्षण गर्दा थप संक्रमित बढ्दै गएका छन् ।
स्वास्थ्य मन्त्रालयको पछिल्लो विवरण अनुसार देशभर कोरोना संक्रमितको संख्या ४२ पुगेको छ भने ५ जना उपचारपछि निको भएर ‘डिस्चार्ज’ भइसकेका छन् ।
उदयपुरमा कोरोना संक्रमित बढ्दै गएपछि प्रदेश १ सरकारले उदयपुरलाई सील गर्ने निर्णय गरेको छ । अब जिल्ला भित्रबाट बाहिर जान र जिल्ला भित्रै पनि एक ठाउँबाट अर्को ठाउँमा जान आउन रोक लगाइएको आन्तरिक सुरक्षा मन्त्रालयले जनाएको छ ।
