काठमाडौँ । राष्ट्रिय जनमोर्चा नवलपुरले कोरोना सङ्क्रमणका बेला खटिएका स्वास्थ्यकर्मी, सुरक्षाकर्मी, पत्रकार, राहत वितरणमा लागेका सामाजिक कार्यकर्ता र सामान ओसारपसार तथा वितरणमा खटिएका कर्मचारीप्रति अभिनन्दन व्यक्त गरेको छ । राजमोले यस महामारीमा खटिएका योद्धाका लागि विशेष सुविधा उपलब्ध गराउनसमेत माग गरेको छ ।
राजमो नवलपुरका अध्यक्ष दीपक पाण्डेको हस्ताक्षरमा २०७७ वैशाख ९ गते जारी प्रेसवक्तव्यमा सरकारले आफ्ना नागरिकप्रतिको उत्तरदायित्व ठिकसँग नलिएको पनि आरोप लगाइएको छ । लकडाउनपछि श्रमिक, विद्यार्थीलगायतको तप्का भोकमरीको स्थितिमा रहेको, कार्यस्थलमा घर जाने जनताले कष्ट भोग्नुपरेको, हजारौँ प्रवासी नेपाली सिमानामा अलपत्र परेको राजमोले उल्लेख गरेको छ । राहत वितरणको जिम्मा स्थानीय तहलाई दिएर सरकार उम्कन खोजेको, तर स्थानीय तहसँग साधनश्रोतमो अभाव भएपछि राहत वितरण प्रभावित भएको पनि राजमोको ठहर छ ।
राहत वितरणको सन्दर्भमा पनि सत्तावरिपरिका मत्तासुरले राष्ट्रिय पार्टी वा ठुला पार्टीको रट लगाएकोमा राजमोले आपत्ति प्रकट गरेको छ । यस्ता दलले आफूभन्दा बाहिरका राजनीतिक शक्ति, सामाजिक सङ्घसंस्था र सरोकारवालालाई पन्छाएर भ्रष्टाचारका लागि दाउ खेलेको बताउँदै राजमोले यस्तो कार्य लज्जास्पद र विश्व समुदायसामु राष्ट्रको शिर निहुराउने भएको बताइएको छ ।
नवलपुर भारतसित जोडिएको जिल्ला भएकाले कोरोना सङ्क्रमणको उच्च जोखिमयुक्त भएको बताइएको छ । दक्षिणतिरको खुल्ला सिमानाका कारण यस जिल्लामा कोरोना सङ्क्रमणको सम्भावना बढ्दै गएको बताउँदै त्यसप्रति उच्च सतर्कता अपनाउन राजमोले माग गरेको छ । अर्कातिर, लकडाउनका कारण विपन्न सर्वसाधारण नागरिकलाई भोकमरीबाट बचाउन अत्यावश्यक सामग्रीको ओसारपसार, विक्री–वितरण, कृषि उत्पादनको उचित व्यवस्थापनतर्फ जोड दिन राजमोले माग गरेको छ ।
त्यसैगरी, राजमो नवलपुरले कोरोना सङ्क्रमण रोक्न नागरिक स्तरबाट पनि सतर्कता अपनाउनुपर्ने आवश्यकतामा जोड दिइएको छ । राजमोले भनकेको छ– “सरकारी आदेश र निर्देशनको मात्र भर परेर बस्नु जोखिमयुक्त हुने छ ।” त्यसका लागि सामाजिक जीवनका सबै क्षेत्र, प्रशासनिक निकाय, स्थानीय सरकार, जनप्रतिनिधि र राजनीतिक पार्टीसित राजमो नवलपुरले अनुरोध गरेको छ ।
