दाङ । राष्ट्रिय जनमोर्चा जिल्ला समिती दाङ देउखुरीले राप्ती स्वास्थ्य विज्ञान प्रतिष्ठानमा ल्याब सञ्चालन गर्न माग गरेको छ । घोराहीस्थित प्रतिष्ठानको साझा औषधि पसलसमेत सञ्चालन गर्न राजमोले माग गरेको छ ।
आइतबार जिल्ला अध्यक्ष गणेश आचार्यले विज्ञप्ति प्रकाशित गरी लकडाउन लामो हुँदा नियमित औषधि खाने बिरामीहरुलाई समस्या परेको भन्दै बन्द रहेको साझा सञ्चालन गर्न आग्रह गर्नुभएको हो ।
विज्ञप्तिमा भनिएको छ, ‘अहिले विश्वव्यापी कोरोना भाइरसले आतंक सृजना गरिरहेको छ । यो बेलामा मान्छेको जीवन रक्षानै सबैभन्दा ठूलो विषय बनेको छ । विश्वव्यापी लकडाउनको अबस्था छ । नेपाल पनि लकडाउनकै अबस्थामा छ ।
लकडाउन लामो हुँदा नियमित औषधि खाने बिरामीहरुलाई समस्या परेको छ । यो बेलामा घोराहीको राप्ती स्वास्थ्य बिज्ञान प्रतिस्ठानमा रहेको साझा स्वास्थ्य संस्थालाई बन्द गरिएको छ । जसले गर्दा बिरामीले सहज रुपमा औषधि पाउन सकेका छैनन् ।
राप्ती स्वास्थ्य बिज्ञान प्रतिस्ठानमा कोरोना ल्याब स्थापन हुने कुराको चर्चा भएता पनि अहिलेसम्म हुन सकेको छैन । त्यसैले तत्काल ल्याब सञ्चालन गरी कोरोना परीक्षणलाई तिब्रता दिन र साझालाई सुचारु गराउन सम्बन्धित सरोकारवाला सित अनुरोध गर्दछौं ।
यो विषम परिस्थितिमा आन्तरिक द्वन्द्व सृजना गर्ने भन्दा पनि आपसमा भएका अन्तरविरोधहरुलाई पनि थाती राखेर जनताको जीवन रक्षा यति बेलाको मुख्य कुरा हो । त्यसैले यसमा कसैका राजनीतिक आग्रह पुर्वाग्रहहरु छ्न् भने पनि यो बेलामा कसैले नसम्झौं, जनताको स्वास्थ्य र जीवन रक्षा मात्र मुख्य मुद्दा बनाउन सबैमा अनुरोध गर्न चाहान्छौं।’
