काठमाडौं । नेपालमा तीन जना माडौंकी १९ वर्षीया एक युवती र बागलुङकी ६५ वर्षीया महिला कोरोना संक्रमणबाट मुक्त भएका हुन् । यस अघि पहिलो कोरोना संक्रमित चीनको वुहानबाट फर्केका युवा निको भएर घर फर्किसकेका छन् ।
काठमाडौँको मैतीदेवीकी १९ वर्षीया प्रसिद्धी श्रेष्ठ शुक्रराज ट्रपिकल तथा सरूवा रोग अस्पतालमा २७ दिनसम्म उपचार गरी पूर्ण रूपमा स्वस्थ भएर शनिबार घर फर्केकी छन् । सबै रिपोर्ट नेगेटिभ आएसँगै अस्पतालले शनिबार उनलाई डिस्चार्ज गरेको हो। उनी नेपालमा भेटिएको दोस्रो कोरोना संक्रमित हुन् ।
फ्रान्सबाट चैत ४ गते कतार हुँदै नेपाल आएकी ती युवतीका चैत १० गते संक्रमण भएको पुष्टि भएको थियो । उनलाई सोही दिनदेखि नै शुक्रराज ट्रपिकल तथा सरुवा रोग अस्पतालको आइसोलेसनमा वार्डमा उपचारका लागि भर्ना गरिएको थियो ।
अस्पतालबाट बाहिर निस्कँदै उनले आफू पूर्ण रुपमा निको भएर घर फर्किएको प्रतिक्रिया दिएकी थिइन् ।
६५ वर्षीया वृद्धाले जितिन् कोरोनालाई
यस्तै, नेपालकी छैटौँ कोरोना संक्रमित महिलालाई पनि कोरोना निको भएको छ । धौलागिरि अञ्चल अस्पतालमा १७ दिनदेखि उपचाररत बागलुङ नगरपालिका–३ गौंडाकोटकी ६५ वर्षीया उनको तेस्रो र चौथो पटकको रिपोर्ट नेगेटिभ अर्थात् कोरोना निको भएको आएको हो ।
गत चैत ४ गते बेल्जियमबाट कतार हुँदै बागलुङ आएकी उनलाई चैत १७ गते कोरोना संक्रमण भएको पुष्टि भएपछि धौलागिरि अञ्चल अस्पतालको आइसोलेशनमा भर्ना गरी उपचार भइरहेको थियो ।
कोरोना सङ्क्रमण भएको पुष्टि भएपछि धौलागिरि अञ्चल अस्पतालको आइसोलेशन वार्डमा उपचाररत महिलाको यसभन्दा पहिले दुई पटक स्वाब परीक्षण गर्दा पोजेटिभ आए पनि तेस्रो र चौथौ पटक नेगेटिभ आएका कारण उनलाई कोरोना ठीक भएको गण्डकी प्रदेश स्वास्थ्य कार्यालयका प्रमुख सुरज गुरौँले जानकारी दिनुभयो ।
नेपालमा अहिलेसम्म ३० जनामा कोरोना भाइरसको संक्रमण देखिएको छ।
