काठमाडौं । सरकारले भारतसँगको सीमा बन्दलाई थप कडाई गर्ने निर्णय गरेको छ । लकडाउनको समयमा पनि खुला सीमाको फाइदा उठाएर लुकिछिपी आउजाउ गरिरहेको पाइएपछि थप कडाई गर्न लागिएको सरकारका प्रवक्ता एवं सञ्चार तथा सूचना प्रविधि तथा अर्थमन्त्री युवराज खतिवडाले बताउनुभयो ।
मन्त्रिपरिषद बैठकले नेपाल प्रवेश गर्ने सबै विन्दु र भारतसँग जोडिएका खुला सीमानाका बन्दलाई निरन्तरता दिने निर्णय गरेको हो । हालै सरकारले सीमा बन्द कडा पार्न सहायक नाकाहरुमा सशस्त्र प्रहरीका १५ सय बढी अस्थायी पोष्ट थप गरेको छ भने १० हजार बढी सुरक्षाकर्मी परिचालन गरेको छ ।
विभिन्न जिल्लामा रहेका नेपाल प्रहरी र सशस्त्र प्रहरीलाई सीमानामा खटाउने गरी सोमबार गृह मन्त्री रामबहादुर थापाले निर्देशन दिनुभएको थियो ।
यस्तै, सरकारले मालसामानको ढुवानी जारी राख्ने जनाएको छ भने, सरकारी निर्णयको अवज्ञा गर्दै नेपाल प्रवेश गर्ने वा कुनै विदेशी नागरिकलाई लुकाएर राखेको पाइएमा प्रचलित कानून अनुसार कारवाही गर्ने निर्णय पनि गरिएको सरकारका प्रवक्ता एवं सञ्चार तथा सूचना प्रविधि तथा अर्थमन्त्री युवराज खतिवडाले जनाकारी दिनुभयो ।
यस्तै, सरकारले लक डाउनको अवधि वैशाख १५ गतेसम्म थप गर्ने निर्णय गरेको छ । पहिलो पटक चैत ११ गतेबाट लागु हुनेगरी एक हप्ता लक डाउनको घोषणा गरेको सरकारले चौथो पटक बैशाख १५ गतेसम्म समय थपेको हो । यसअघि लक डाउन अवधि बढाउँदै चैत २५ गतेसम्म पुर्याइएको थियो । त्यसपछि वैशाख ३ गतेमध्यरातिसम्म लकडाउनको अवधि थप गरिएको थियो ।
सरकारले सहसचिवहरुको बढुवा तथा सचिवहरुको सरुवा गर्ने निर्णय पनि गरेको छ । प्रशासन कलस्टरका सह सचिव अर्जुन पोखरेललाई सचिवमा बढुवा गर्दै प्रदेश नम्बर २ को प्रमुख सचिवमा सरुवा गरेको छ । प्रदेश नम्बर २ का प्रमुख सचिवलाई सुदूपरपश्चिमको प्रमुख सचिवमा सरुवा गर्ने निर्णय सरकारले गरेको छ ।
त्यसैगरी इञ्जिनियरिङ कलस्टरका सहसचिव सागर राईलाई सचिवमा बढुवा गर्दै नेपाल ट्रष्टको सचिवमा सरुवा गरिएको डा. खतिवडाले जानकारी दिनुभयो ।
