काठमाडौं । कोरोना संक्रमणको आशंकामा पाटन अस्पताल भर्ना भएका तीन जनाको र्यापिड टेष्टका क्रममा कोरोना पोजेटिभ भेटिएको छ ।
भक्तपुरको काँडाघारीका तीनै जनाको स्वाव थप परीक्षणका लागि टेकु अस्पताल पठाएको छ । पाटन अस्पतालका निर्देशक विष्णुप्रसाद शर्माका अनुसार सोमबार दिउँसो अस्पताल भर्ना भएका उनीहरुको र्यापिड टेष्ट गर्दा पोजिटिभ देखिएपछि थप परीक्षणका लागि लागि राष्ट्रिय जनस्वास्थ्य प्रयोगशाला टेकु पठाइएको हो ।
पेप्सीकोलाको एक अपार्टमेन्टमा बस्दै आएका उनीहरुमा कोरोना संक्रमण देखएपछि त्यस क्षेत्रमा प्रहरीले सक्रियता बढाएको छ ।
प्रहरीका अनुसार उनीहरु गत चैत ५ गते बेलायतबाट नेपाल आएका थिए । यद्यपी र्यापिड टेष्टमा कोरोना पोजेटिभ देखिएपनि उनीहरुमा संक्रमण भए नभएको पीसीआरबाट थप परीक्षण पछि मात्रै पुष्टि हुनेछ ।
र्यापिड टेष्टमा पोजेटिभ देखिएका कतिपय बिरामीमा कोरोना नभएको देखिन्छ । सोमबार मात्रै बागलुङकी एक महिलामा र्यापिड टेष्ट गर्दा पोजेटिभ देखिएको थियो भने पोखरामा गरिएको पीसीआर परीक्षणका क्रममा आज उनमा कोरोना नभएको पुष्टि भएको छ ।
