काठमाडौं । बागलुङमा थप एक जनामा कोरोना संक्रमण देखिएको छ । आइतबार र्यापिड टेस्टका क्रममा बागलुङको काठेखोला गाउँपालिकाकी ६५ वर्षीया महिलामा कोरोना (कोभिड–१९) संक्रमण देखिएको हो ।
उनको थप परीक्षणका लागि स्वाव पोखरा पठाउन लागिएको छ । धौलागिरी अस्पतालका डाक्टर शैलेन्द्र विक पोखरेलले र्यापिड टेस्टका क्रममा एक महिलामा कोरोना पोजेटिभ देखिएको जानकारी दिनुभयो । काठेखोला गाउँपालिका वडा नम्बर ६ का वडाध्यक्ष युक्तप्रसाद कँडेलका अनुसार ती महिला २३ दिनअघि भारत तीर्थ गएर आएकी थिइन्।
यसअघि बागलुङकै ६५ वर्षीय महिला र १९ वर्षीय युवतीमा कोरोना संक्रमण पुष्टि भएको थियो । उनीहरु दुवै धौलागिरी अस्पतालमा उपचाररत् छन् । योसँगै नेपालमा कोरोना संक्रमितको संख्या १३ पुगेको छ ।
तीन जना बागलुङमा, तीन जना हेटौँडामा, दुई जना काठमाडौं र दुई जना धनगढीमा उपचाररत छन् । एक जना उपचारपछि घर फर्केका छन् ।
यस्तै, नारायणी अस्पतालको आइसोलेसन वार्डमा राखिएका तीन भारतीयमा पनि कोरोना संक्रमण देखिएको छ ।
