काठमाडौं । राष्ट्रिय जनमोर्चाका उपाध्यक्ष एवं सांसद दुर्गा पौडेलले सीमा क्षेत्रमा सुरक्षा कर्मीहरुको उपस्थिति बढाउन सरकारलाई सुझाव दिनुभएको छ ।
शुक्रबार कानुन, न्याय तथा संसदीय मामिला मन्त्री डा. शिवमाया तुम्बाहाङ्फेले कोरोना भाइरस (कोभिड–१९) संक्रमण रोकथाम र उपचारबारे संघीय संसदमा प्रतिनिधित्व गर्ने राजनीतिक दलहरुबाट सुझाव लिनुभएको थियो । सो क्रममा राजमोका तर्फबाट सुझाव दिँदै उपाध्यक्ष पौडेलले लकडाउनमा भारतबाट लुकिछिपी नेपालतर्फ प्रवेश भइरहेको भन्दै त्यसलाई कडाईका साथ रोक्न सुरक्षाकर्मीको उपस्थिति बढाउन आग्रह गर्नुभयो ।
त्यस क्रममा पौडेलले भारतका विभिन्न शहरबाट सीमानामा आएर अलपत्र परेका नेपालीलाई स्वदेश आउन दिनुपर्ने र १४ दिन क्वारेन्टिनमा राखेर घर पठाउनुपर्ने बताउनुभयो । उहाँले भारतीय सीमामा रोकिएका करिब दुई हजार नेपालीलाई भारतीय पक्षले राम्रो व्यवहार नगरेको भन्दै तत्काल उनीहरुको उद्दार गर्न आग्रह गर्नुभयो ।
उपाध्यक्ष पौडेलले स्वास्थ्य सामग्री छिटो प्रक्रिया पु-याएर ल्याउन र सम्बन्धित निकायमा वितरण गर्न पनि मन्त्री तुम्वाहाङ्फेसँग आग्रह गर्नुभयो । उहाँले राहत वितरण व्यवस्थित गर्न र तीनै तहको प्रशासन संयन्त्रलाई सक्रीय बनाउन पनि सुझाव दिनुभयो ।
मन्त्री तुम्बाहाङ्फेले राजमो उपाध्यक्ष पौडेलसहित नेकपा मुख्य सचेतक देव गुरुङ, कांग्रेस प्रमुख सचेतक बालकृष्ण खाँड, समाजवादी पार्टीका प्रमुख सचेतक उमाशंकर अरगरिया, राजपा प्रमुख सचेतक लक्ष्मणलाल कर्ण, नेमकिपाका सांसद प्रेम सुवाल र राप्रपाका राजेन्द्र लिङ्देनबाट सुझाव लिनुभएको हो ।
राजनीतिक दलबाट प्राप्त सुझावलाई मन्त्री तुम्बाहाङ्फेले नोबल कोरोना रोग रोकथाम तथा नियन्त्रण उच्चस्तरीय समन्वय समितिका संयोजकसमेत रहेका उपप्रधान तथा रक्षामन्त्री ईश्वर पोखरेललाई हस्तान्तरण गर्नुभएको छ । चैत्र २४ गते बसेको मन्त्रिपरिषद्को बैठकले संघीय संसदमा रहेका विभिन्न राजनीतिक दलहरुसँग समन्वय गर्ने जिम्मा कानुनमन्त्रीलाई दिएको थियो ।
