सरोज न्यौपाने, प्युठान ।
झिम्रुक गाउँपालिकाका अध्यक्ष तिलक जिसिले कोरोना भाइरस नियन्त्रण एवं रोकथामका लागि सरकारले घोषणा गरेको लकडाउनबाट प्रभावित असंगठित क्षेत्रमा कार्यरत ज्यालादारी मजदुर, श्रमिक, असहाय, अपांग, वृद्धवृद्दाको जीवन रक्षाको लागि संघीय सरकारले तोकेकै कार्यविधि अनुसार राहत वितरण गर्ने बताउनुभएको छ ।
अध्यक्ष जिसिका अनुसार राहत वितरणका लागि लगत संकलन, खाद्यान्न खरिद लगायतका महत्वोपुर्ण काम सम्पन्न भएकोले विपन्न परिवारका लागि तत्काल राहत वितरण कार्य सुरु हुने उहाँको भनाइ छ ।
राहत वितरणका सन्दर्भमा वृहत् छलफलका लागि गाउँपालिकाले सर्वदलीय बैठकको आह्वान गरेको थियो । सर्वदलीय बैठकले सबै वार्डहरुमा सर्वदलीय समिति मार्फत विपन्न परिवारको सूची तयार पार्ने नितिगत सहमति एवं निर्णय गरेको थियो । बैठकले गरेका महत्वपुर्ण निर्णयहरु सहितको कार्यविधि मस्यौदा तयार गरेर निर्णयका लागि कार्यपालिकामा पठाएको थियो ।
कार्यपालिकाले कार्यविधि मस्यौदालाई सर्वसम्मत पास गर्दै सबै वार्डहरुबाट प्राप्त भएको विपन्न परिवारको सूचीमाथि सर्वदलीय बैठकद्वारा छानबिन गरि उपयुक्तताका आधारमा ४०० परिवारको टुंगो लगाएको थियो । छनोट भएका परिवारलाई सदस्य संख्याका आधारमा राहत उपलब्ध गराइनेछ ।
दुई जना सदस्य रहेको परिवारलाई १५ केजी चामल, १.५ केजी दाल, १.५ लिटर तेल र २ थान साबुन दिइनेछ । त्यस्तै सदस्य संख्या दुई भन्दा माथि भएको परिवारलाई ३० केजी चामल, ३ केजी दाल, ४ थान साबुन र तीन लिटर तेल दिने उल्लेख छ ।
यसका साथै राहतका सामाग्री खरिदका लागि प्युठान उद्योग वाणिज्य संघ, झिम्रुक बजार क्षेत्रसँग पनि समन्वय गरेको थियो । उद्योग बाणिज्य संघका प्रतिनिधिहरुको रोहवरमा तीनवटा खाद्य डिपोसँग प्रतिस्पर्धाका आधारमा खाद्य सामाग्री खरिद गरिएको छ । ४ सय विपन्न परिवारका लागि चामल, दाल, तेल, साबुन लगायतका खाद्य बस्तु खरिद गरेर प्याकेजीङको लागि तयारी अबस्थामा राखिएको छ । भोलि नै प्याकेजीङको काम सकेर पर्सिबाट राहत वितरण सुरु गरिने उहाँको भनाइ छ ।
गाउँपालिकाले सहयोग गर्न चाहनेहरुका लागि सार्वजनिक अपिल समेत जारी गरेको थियो । सोही बमोजिम श्रीमती शान्ता जिसिले रु दुई लाख गाउँ पालिका मार्फत विपन्न परिवारका लागि राहत सहयोग गर्नुभएको छ । त्यस्तै अमेरिकामा रहेकी विद्यार्थी अनूसा पहाडीले आफ्नो पढाई खर्च कटाएर सहयोग स्वरुप रु १० हजार तीन सय उपलब्ध गराउनुभएको छ ।
