काठमाडौं । कोरोना भाइरस (कोभिड–१९) को संक्रमणबाट विश्वका विभिन्न मुलुकमा गरी ११ नेपालीको ज्यान गएको छ । एक सय भन्दा बढी नेपाली कोरोनाको संक्रमणको चपेटामा परेका छन् ।
बेलायतमा मात्रै ६ जना नेपालीले ज्यान गुमाएका छन् । पछिल्लो पटक बुधबार बेलायतको ननिटन निवासी ५६ वर्षीय भूतपूर्व गोर्खा मेखबहादुर गुरुङको कोरोना संक्रमणबाट निधन भएको छ । यसअघि बेलायतमा कोरोनाका कारण भूपू गोर्खा सैनिक लीलाबहादुर राई, प्रशान्त अर्याल, चेतप्रसाद गुरुङ, शिव श्रेष्ठ तथा नातिको विवाहमा बेलायत आएका अर्का एक ७० वर्षीय नेपालीको मृत्यु भएको थियो ।
बेलायतका लागि नेपाली राजदूत डा. दुर्गा बहादुर सुवेदीले सामाजिक सञ्जाल ट्विटरबाट बेलायतबासी नेपालीहरुलाई सपरिवार सुरक्षित बस्न आग्रह गरेका छन् । फुर्सदको समयमा आफना बालबालिकाहरुलाई मातृभाषा नेपाली सिकाउन उनले अनुरोध गरेका छन् ।
यस्तै, अमेरिकाको न्युयोर्कमा पाँच नेपालीको कोरोनाका कारण निधन भएको छ । मृत्यु हुनेमा ५० वर्षीय अनिल लिम्बू, ४० वर्षीय सोनाम लामा, ४८ वर्षीय थोक्मे बिष्ट, निमा टेम्बा शेर्पा र अजयमान छोचु रहेका छन् । सबै न्युयोर्कमा बस्दै आएका थिए ।
हङकङमा एक नेपाली संक्रमित भएका छन् । उनको उपचार भइरहेको छ ।
यता, ओमानमा रहेका नेपाली भने सुरक्षित छन् । मस्कटस्थित नेपाली दूतवासले हालसम्म कुनै पनि नेपालीमा कोरोनाको संक्रमण नभएको जनाएको छ ।
कोरोना भाइरसबाट अहिलसम्म ओमानमा ४५७ संक्रमित भएका छन्। संक्रमितमध्ये दुईको मृत्यु र ७१ जना स्वास्थ्यलाभ गरी घर फर्केका छन्।
यही चैत २८ देखि आगामी वैशाख १२ गतेसम्म ओमान सरकारले लकडाउन गर्ने तयारी गरेको भन्दै दूतावासले उक्त समयमा अत्यावश्यकबाहेक कुनै पनि काममा घर बाहिर ननिस्कन त्यहाँका सबै नेपालीमा आग्रह गरेको छ।
ओमानमा रहेका तथा बिदामा नेपाल आएका नेपालीको भिसाको म्याद समाप्त भए अनलाइनबाट भिसा थप गर्ने व्यवस्था मिलाएको दूतावासले जनाएको छ।
बहराइनमा कोरोना संक्रमितको संख्यामा बढेसँगै मनमास्थित नेपाली दूतावासबाट प्रदान हुँदै आएको कन्सुलर सेवा तत्कालका लागि स्थगन गरिएको छ । दूतावासले बिहीबार सूचना जारी गर्दै अर्को व्यवस्था नभएसम्मका लागि कन्सुलर सेवा स्थगन गरिएको जनाएको हो ।
अत्यावश्यक अवस्थामा कन्सुलर सेवा लिन परेमा दूतावाससँग समय लिई एक जनामात्र उपस्थित भएर सेवा लिन सकिने बताइएको छ।
