काठमाडौं । सत्तारुढ दल नेकपा (माओवादी) को प्रवासी संगठन नेपाली जनप्रगतिशील मञ्च बेलायत विभाजित भएको छ ।
संगठनको सदस्यता वितरणमा मनोमानी गरेको, एकाधिकार लादेको र आलोचना गर्नेमाथि कारबाही चलाएको लगायत कारण देखाउँदै समानान्तर नयाँ कमिटी गठन भएको हो ।
संगठनका अध्यक्ष मानबहादुर गुरुङ पक्षको सम्मेलन चलिरहेका बेलामा उपाध्यक्ष नवीन स्याङ्तानको नेतृत्वमा छुट्टै कार्यसमिति घोषणा भएको छ।
स्याङ्तानको अध्यक्षतामा बेग्लै सम्मेलन गरी २८ सदस्यीय कार्यसमिति घोषणा गरिएको हो ।
उता गुरुङ पक्षको सम्मेलन जारी छ भने संगठनका सचिवालय सदस्य तथा मिडिया विभाग प्रमुख सन्तोष भट्टराई पक्ष भने तटस्थ बसेको छ। भट्टराईले नेतृत्वलाई सच्चिन आग्रह गरेका छन्।
भट्टराईले धनीहरूले प्रतिनिधि किन्ने, वास्तविक योद्वालाई उपेक्षा गर्ने र प्रश्न गर्नेलाई मुख थुन्ने स्थिति देखिएको बताए।
प्रतिनिधि छनोट गरेर सम्मेलन गर्नुपर्नेमा जसरी पनि निर्वाचन जित्ने स्थिति देखिएको उनले बताए।
‘माओवादीका कटिबद्व कार्यकर्ताको नाम नहुने फरक संगठनका मान्छेको लेबी तिरेर भोट बैंक बनाउन आफैँ पैसा तिरेर हुलका हुल मान्छे हुलेको देखियो’ उनले भने।
