काठमाडौं । दुबईको दुईजना नेपाली युवकलाई मृत्युदण्ड दिन लागिएको खुलासा भएको छ । पाँचवर्षदेखि जेलमा रहेका उनीहरुसँग ५० लाख रुपैयाँ ब्लडमनी मागिएको एक सांसदले संसदलाई जानकारी गराएका छन् ।
बिहीबार प्रतिनिधिसभाको शून्य समयमा बोल्दै नेपाली कांग्रेसका सांसद रामहरी खतिवडाले यूएईको दुबईमा जेलमा रहेका दुई नेपालीलाई मृत्युदण्ड दिन लागिएको जानकारी दिए ।
ति दुई नेपाली युवालाई सरकारले ब्लडमनी तिरेर स्वदेश ल्याउन उनले सरकारको ध्यानाकर्षण गराएका छन्।
सांसद खतिवडाका अनुसार ओखलढुंगाको चिसंगुगढी–३ बस्ने यमबहादुर श्रेष्ठका छोरा भुवन र धादिङ निवासी पहलमान श्रेष्ठलाई त्यहाँको सरकारले मृत्युदण्ड दिन लागेको हो । उनीहरु आफ्नै साथीको हत्या आरोपमा ५ वर्षदेखि जेलमा छन् ।
नवलपरासीका बाबुराम आलेको मृत्युपछि अस्पताल लैजाँदै गर्दा त्यहाँको सरकारले पक्राउ गरी ५० लाख ब्लडमनी तोकेको हो ।
‘ओखलढुंगा चिसंगुगढी–३ बस्ने यमबहादुर श्रेष्ठका छोरा भुवन र धादिङ निवासी पहलमान श्रेष्ठ ५ वर्षदेखि यूएईको दुबईमा एउटा जेलमा हुनुहुन्छ। उहाँहरू नवलपरासिको साथी बाबुराम आलेलाई हस्पिटल लैजाँदा आलेको मृत्यु भएपछि त्यो केसमा ५० लाख ब्लडमनी दिनुपर्ने कारणले जेलमा हुनुहुन्छ,’ सांसद खतिवडाले भने, ‘ब्लडमनी नदिए मृत्युदण्ड दिने घोषणा गरेको छ। सरकारले उहाँहरूलाई ब्लडमनी तिरेर स्वदेशमा ल्याउने पहल गरोस्। प्रधानमन्त्री र परराष्ट्रमन्त्रीले पहल गर्ने व्यवस्था गर्नुपर्यो।’
