महेन्द्रनगर । राष्ट्रिय जनमोर्चा कञ्चनपुरले भारतीय सीमा क्षेत्रमा अलपत्र परेका नेपालीहरुलाई आफ्नो देशमा आउने मौका दिनुपर्ने माग गरेको छ । सोमबार एक विज्ञप्ति प्रकासित गरी राजमोले सीमा क्षेत्रमा रहेका नेपालीलाई नेपाल आउने मौका दिएर उनीहरुको स्वास्थ्य परीक्षण गर्नुपर्ने पार्टीको धारणा स्पष्ट पारेको हो ।
जिल्ला अध्यक्ष रामबहादुर कार्कीले प्रेसित गर्नुभएको विज्ञप्तिमा भारतीय सीमा क्षेत्रमा रहेका नेपालीप्रति भारतले गरेको अमानवीय व्यवहारप्रति आपत्तिसमेत प्रकट गरिएको छ ।
राजमो कञ्चनपुरले सीमा क्षेत्रको समस्या तथा लकडाउनको पालना एवं राहत वितरण लगायतका विषयमा सरकारलाई विभिन्न ७ बुँदे सुझावसमेत दिएको छ ।
यस्ता छन्, राजमो कञ्चनपुरका सुझावहरुः
१) कञ्चनपुर जिल्लासँग जोडिएका सीमा क्षेत्रमा रहेका नेपालीहरुलाई एक पटक नेपाल प्रवेश गराई स्वास्थ्य परिक्षणको व्यवस्था गर्न सरकारसँग माग गर्दछौं।
२) सीमा क्षेत्रमा रहेका नेपालीहरुलाई भारतीय सरकारले गरेको अमानवीय व्यवहारको विरोध गर्दै खेद प्रकट गर्दछौं।
३) नेपाल सरकार ले समेत कञ्चनपुर उच्च जोखिममा राखेकाले खुल्ला नाका बाट अबैध रुपमा प्रवेश को कडा निगरानी गर्नु पर्छ ।
४) नेपाल सरकारले तय गरेको राहत वितरण कार्यविधि अनुसार ठुलो परिवारलाइई अपर्याप्त हुने भएकोले समयमा नै उचित व्यवस्था गर्न नेपाल सरकारको ध्यानाकर्षण गर्दछौँ।
५) सामाजिक सञ्जालमा देखिए झैं राहत वितरण प्रणालीले झन् प्रकोप निम्त्याउने हुनाले एकद्धार प्रणाली लागू गर्नु पर्छ ।
६) विभिन्न संघ संस्था, व्यक्तिबाट वितरित खाद्य पदार्थ गुणस्तर यकिन नहुँदा झन् समस्या आउने भएकोले यसको प्रवन्ध मिलाउनु पर्छ ।
७) जिल्लामा कतिपय स्थानमा कालोबजारी देखापरेकाले स्थानीय प्रशासनले तत्काल निगरानी व्यवस्था गर्नु पर्छ।
