काठमाडौं । नेपालमा रहेका आफ्ना नागरिक फिर्ता लैजान विभिन्न देशले पहल गरेका छन् । आज (शनिबार) पनि चार देशले विमान चार्टड गरी आफ्ना नागरिक फिर्ता लैजाँदैछन् ।

नेपालमा रहेका विदेशी नागरिकलाई उनीहरुकै मुलुक फर्काउन धमाधम चार्टर्ड उडान गरिरहेका छन् । लकडाउनका कारण रोकिएका विदेशीलाई लैजान सम्बन्धित मुलुकको दूतावास मार्फत् नेपालको परराष्ट्र मन्त्रालय, अध्यागमन विभाग, नेपाल पर्यटन बोर्डसँगको समन्वयमा ती मुलुकले आफ्ना नागरिक चार्टर्ड उडान मार्फत् लगिरहेका हुन् ।

जर्मनी र फ्रान्स दूतावासले कतार एयरको दुई जहाज चार्टर्ड गरी आफ्ना नागरिक लैजाने तयारी गरेका छन् ।
त्रिभुवन अन्तर्राष्ट्रिय विमानस्थलमा ति जहाज आइसकेको विमानस्थल स्रोतले जनाएको छ । यस्तै, मलेसियाको मालिण्डो एयर, चेक रिपब्लिकन र श्रीलङ्कन एयरले आज चार्टर्ड उडान गर्नेछन् ।

कतार एयरवेजको जहाज शनिबार दिउँसो दोहाहुँदै पेरिस पुग्ने तालिका रहेको विमानस्थलले जनाएको छ । आजै मलेसियाले नेपालमा रहेका आफ्ना नागरिकलाई मलेसिया एयरलाइन्सबाट फिर्ता लैजानेछ ।

लकडाउनको आज १२औँ दिनको अवधिसम्म एक हजार पाँच सयभन्दा बढी विदेशी नागरिक फर्किसकेका छन् ।

भारतमा नेपालीको विजोग, भेडाबाख्राझैं कोचिएर बस्न बाध्य
यता, भारतका विभिन्न शहरबाट सीमासम्म आइपुगेका नेपालीहरु भने भारतीय भूमिमा भेडाबाख्रा जस्तै कोचिएर बस्नुपरेको तस्बिरहरु सामाजिक सञ्जालमा भाइरल भइरहेका छन् । सुदूरपश्चिमसँग जोडिएको सीमानजिक भारतीय भूमिका क्वारेन्टिनमा बसेका नेपालीहरुको अवस्था देख्दा लाग्छ, उनीहरु मानिस नभएर बेच्नका लागि राखिएका भेडाबाख्रा हुन् ।

सीमा क्षेत्रमा केयौं दिनदेखि नेपाल प्रवेश गर्न अनुमित मागेका हजारौं नेपालीलाई सरकारले नेपाल आउन नदिएपछि भारतीय भूमिमै कोचाकोच भएर बस्न बाध्य भएका हुन् ।

नेपाल–भारत सीमा बन्द भएपछि सुदूरपश्चिमसँग जोडिएको भारतीय भूमिमा मात्रै हजारभन्दा बढी नेपाली रोकिएका छन्। तर क्वारेन्टिन व्यवस्थित नहुँदा उनीहरू कोचाकोच गरेर बस्नुपरेको छ। सुदूरपश्चिमका कैलाली, कञ्चनपुर, बैतडी र दार्चुला नाकाबाट आफ्नो देश प्रवेश गर्ने अनुमति नपाएपछि उनीहरू उतै रोकिन बाध्य भएका हुन्।

कोरोना भाइरसको संक्रमण फैलिन नदिन उनीहरूलाई क्वारेन्टिनमा राखिएको भए पनि कोचाकोच गरेर बस्नुपरेकाले झनै जोखिम बढाएको छ । दार्चुला पारी धार्चुलामा ९ सय ५७ जना नेपाली क्वारेन्टिनमा रहेको प्रशासनले जनाएको छ।
कञ्चनपुरस्थित महाकाली पारी बनबासा र टनकपुर क्षेत्रका क्वारेन्टिनमा पनि स्थिति उस्तै छ ।

एउटै कोठामा २५–३० जनासम्म कोचिएर बस्नुपरेको, हलमा डेढ सय जनासम्म र ग्यालरीमा पनि उस्तै गरी बस्नुपरेको दूरावस्था त्यहाँबाट नेपालीहरुले सामाजिक सञ्जालमा फोटोसहित उल्लेख गरेका छन् ।

यता, सुनौली नाकामा पनि करिब पाँच सय नेपाली तीन दिनसम्म धर्ना बस्दासमेत सरकारले नेपाल प्रवेशको अनुमति नदिएपछि भारतीय क्वारेन्टिनमा बसेका छन् ।

नेपालको सुदूरपश्चिमसँग जोडिएको भारतीय भूमिस्थित क्वारेन्टिनमा मात्रै अहिले १ हजार ४ सय ३ नेपाली बसिरहेको बताइन्छ । भारतमा रहेका नेपाली स्वेदश फर्किने क्रम अझै रोकिएको छैन । जसले गर्दा सीमाका भारतीय क्वारेन्टिनमा नेपालीको संख्या दिनप्रतिदिन बढ्दै गएको हो ।

भारतले देशव्यापी लकडाउन गरेपनि विभिन्न शहरबाट फर्कने नेपालीहरुलाई रोकेको छैन । न त व्यवस्थित क्वारेन्टिन नै बनाएर राखेको छ । सयौंको संख्यामा नेपालीहरु सीमानामा बस्दा यदी कसैमा कोरोना संक्रमण भए त्यसले थप भयावह अवस्था निम्त्याउन सक्ने देखिन्छ ।