काठमाडौं । प्रधानमन्त्रीका प्रेस सल्लाहकार सुर्य थापाले नेपाल पत्रकार महासंघको नेतृत्वलाई कडा चेतावनी दिएका छन् । काठमाडौं प्रेसमा प्रकासित भ्रष्टाचार सम्बन्धी समाचार डिलिट गरेको विषयमा बिहीबार महासंघले निकालेको विज्ञप्तिप्रति आपत्ति जनाउँदै थापाले महासंघ नेतृत्वलाई ‘माफी माग्न’ चेतावनी दिएका हुन् ।
बिहीबार साँझ लामो फेसबुक स्ट्याटस लेख्दै थापाले महासंघले निकालेको विज्ञप्तिलाई ‘छाता संस्थाको गुटगत र निहीत स्वार्थमा नांगो दुरूपयोग मात्रै’ भएको आरोप लगाएका छन् । उनले समाचारको विषयमा काठमाडौं प्रेसका प्रधान सम्पादक कसमस विश्वकर्मासँग चासो राखेपनि समाचार हटाउन दबाब नदिएको दाबी गरेका छन् ।
थापाले स्ट्याटसमा लेखेका छन्, ‘स्वास्थ्य मन्त्रालयअन्तर्गत स्वास्थ्य सामग्री खरिदसम्बन्धी रद्द भइसकेको विषयमा जे निर्णय भएको थियो वा छ, त्यसको स्पष्ट जवाफदेहिता बहन गर्ने निकाय र अधिकारीहरू संलग्न नै छन् । त्यसमा सम्माननीय प्रधानमन्त्रीज्यूको सचिवालय र सल्लाहकारहरू वा उहाँहरूका सरोकार नै नभएका छोराहरूलाई जबर्जस्ती र तथ्यहीन ढंगले तान्ने र बदनाम गर्ने षड्यन्त्रपूर्ण चालबाजी, उपक्रम र रवैया खेदजनक छ । यसको जति भर्त्सना गरे पनि कम हुन्छ ।’
उनले पत्रकार महासंघले उक्त समाचार हटाउन राजनीतिक सल्लाहकार र प्रेस सल्लाहकारले दबाब दिएको भनेर जारी गरेको वक्तव्यमा कुनै सत्यता नरहेको, बरू अत्यन्त हास्यास्पद र गैरजिम्मेवार आरोप पनि लगाएका छन् ।
यस्तै उनले भ्रमको खेती नगर्न पनि महासंघलाई चेतावनी दिएका छन् । ‘हामीले कसरी श्रव्य वा दृश्य, मौखिक वा लिखित र टेलिफोन कुन माध्यमबाट कसलाई दबाब दियौं ?’ थापाले भनेका छन्, ‘यसको प्रमाण प्रस्तुत गर्न, अन्यथा छायाँयुद्दको तथाकथित मोर्चा सिर्जना गर्ने दाउपेच, षड्यन्त्र र भ्रमको खेतीमा नलाग्न समयमै सचेत गराउन चाहन्छौं ।’
उनले ‘कार्यकाल सकिएर महाधिवेशनको सम्मुखमा उभिएको यस संगठनको लेटरप्याड र संस्थागत हैसियत दुरूपयोग गरी आफ्ना आकांक्षाहरूको तुष्टिकरणमा नलाग्न संलग्न व्यक्तिहरूलाई समयमै सचेत हुन र अविलम्ब माफी माग्न’ पनि महासंघका पदाधिकारीलाई चेतावनी दिएका छन् ।
यो पनि पढ्नुहोस्ः समाचार हटाइएकोमा महासंघको आपत्ति, काठमाडौं प्रेसले कानुनी उपचार खोज्ने
यस्तो थियो महासंघको विज्ञप्ति:
