रौतहटको ईशनाथ नगरपालिकाका मेयर सन्तोष मेहता र नेकपाका नगर अध्यक्ष मोहन मेहताविरुद्ध पक्राउ पुर्जी जारी भएको छ । मेयर सन्तोष र नेकपाका नगर अध्यक्ष मोहन दाजुभाइ हुन् ।
एम्बुलेन्समा गाँजा तस्करी गरेको आरोपमा मेहता दाजुभाइविरुद्ध जिल्ला प्रहरी कार्यालय मकवानपुरले पक्राउ पुर्जी जारी गरी जिल्ला प्रहरी कार्यालय रौतहटलाई पठाएको छ । एम्बुलेन्समा गाँजा तस्करी गरेको आरोपमा मकवानपुर जिल्ला अदालतले मेहता दाजुभाइलाई पक्राउ गर्न प्रहरीलाई आदेश दिएको हो ।
गत माघ ११ गते रौतहटको डुमरिया स्वास्थ्य चौकीको बा २ झ १७४९ नम्बरको सरकारी एम्बुलेन्समा तीनवटा झोलाभित्र छवटा पोकामा गाँजा राखी मनहरीबाट हेटौँडातर्फ ल्याउँदै गरेको अवस्थामा प्रहरीले पक्राउ गरेको थियो । प्रहरीले एम्बुलेन्स चेक जाँचका क्रममा ३० किलो ६०० ग्राम गाँजा र नेपाली ९१ हजार तथा भारतीय दुई हजार दुई सय रुपैयाँसमेत बरामद गरेको थियो थियो ।
त्यसक्रममा एम्बुलेन्स चालक रौतहट डुमरियाका ३९ वर्षीय महम्मद खलिद तथा एम्बुलेन्समा सवार रहेका डुमरियाकै १९ वर्षीय अशोक कुमार र भारत बिहारको मोतिहारी जिल्ला बसन्तपुरका २२ वर्षीय विनोद सहनीलाई पक्राउ गरेको थियो। अनुसन्धानका क्रममा पक्राउ परेकाले दिएको बयानका आधारमा मेयर मेहता र उनका भाई नेकपाका मोहनको संलग्नता खुलेको प्रहरीले जनाएको छ ।
अदालतमा विनोद सहनीले दिएको बयानको आधारमा अदालतले रौतहटको ईशनाथ नगरपालिकाका मेयर मेहता र उनका भाइ नेकपाका नगर अध्यक्ष मोहन मेहतालाई पक्राउ गरी बुझाउन जिल्ला प्रहरी कार्यालय मकवानपुरले जिल्ला अदालत मकवानपुरको आदेशअनुसार जिल्ला प्रहरी कार्यालय रौतहटलाई पक्राउ पूर्जी पठाएको हो ।
जिल्ला प्रहरी कार्यालय रौतहट स्रोतले जिल्ला प्रहरी कार्यालय मकवानपुरबाट पत्र आएको बताउँदै खोजबिन भइरहेको जनाएको छ ।
