काठमाडौं । धनगढीस्थित सेती प्रादेशिक अस्पतालमा कोरोना संक्रमण भएर उपचाररत युवाले चिकित्सकहरुले आफूलाई वास्ता नगरेको गुनासो गरेका छन् । स्वास्थ्य रिपोर्ट आएपछि डाक्टरले वास्ता नगरेको गुनासो गरेका उनले आफू कोरोना पोजेटिभ भएको पनि मिडियाबाट थाह पाएको बताए ।
शुक्रबार रिपोर्ट आएपछि आफूलाई छुट्टै राखिएको र कोही चिकित्सक पनि उपचारमा नआएको उनले गुनासो पोखे । घरैबाट मगाएर खाना खाइरहेको र आफू सामान्य रहेको पनि उनले जानकारी दिएका छन् ।
सञ्चारमाध्यमसँगको टेलिफोन कुराकानीमा उनले भने, ‘विश्वव्यापी रुपमा फैलिएको यो रोगबाट डाक्टरहरुलाई पनि डर लागेको हो कि । हिजो रिपोर्ट आएपछि अर्को ठाउँमा सारेको छ । त्यसपछि कसैले हेरेको छैन । औषधि पनि दिएको छैन। घरबाटै खानेकुरा मगाइरहेको छु । डाक्टरलाई मतलबै छैन । मलाई एकचोटी पनि सोध्न आएको छैनन् ।’
स्वास्थ्य तथा जनसंख्या मन्त्रालयले दुबईबाट आएका ती ३४ वर्षीय युवा चैत्र ११ गते अस्पताल भर्ना भएको र शुक्रबार आएको रिपोर्टमा कोरोना पोजिटिभ देखिएको पुष्टि गरेको थियो ।
संयमता अपनाएको छु
संक्रमित ति युवाले आफूले संयमता अपनाएको र धेरै जनाको सम्पर्कमा नगएको पनि सञ्चारकर्मीहरुसँग बताएका छन् । उनी दुबईबाट दिल्ली, काठमाडौं, नेपालगञ्जसम्म जहाज र त्यहाँबाट बसको यात्रा हुँदै धनगढीमा पुगेका थिए । उनी चैत्र ७ गते दुबईबाट बिहानै दिल्ली पुगेका थिए । दिल्लीमा ६ घण्टाको ट्रान्जिट रहेको र सोही दिन बेलुका ४ बजे काठमाडौं उत्रिएको बताए ।
काठमाडौं उत्रिएलगत्तै उनलाई एयरपोर्टमा लिन उनका भाइ (मामाघरका) पुगेका थिए। त्यहाँबाट उनीहरु बिरामीको मामाघर धापासी गएका थिए ।
अर्कोदिन चैत्र ८ गते ती बिरामी बसबाट धनगढी जाने उद्देश्यले गोगंवुस्थित नयाँ बसपार्क पुगे । तर, बसको टिकट नपाएपछि उनले जहाजमा जाने सोच बनाए । तर, धनगढीको जहाजको टिकट नपाएपछि उनले नेपालगञ्जको टिकट काटे ।
बिहान भाइले एयरपोर्ट छोडिदिएको र आफू नेपालगञ्जसम्म आएको उनले बताएका छन् । नेपालगञ्ज विमानस्थलबाट अटोरिक्सा हुँदै उनी कोहलपुल पुगेका हुन् । कोहलपुलबाट हाइस लिएर अत्तरियासम्म आएको र अत्तरियाबाट पुनः विंगर लिएर धनगढी आएको उनले बताएका छन् ।
यसअवधिमा आफू सचेत रहेको र मुखमा मास्क तथा सेनिटाइजरको प्रयोग गरेको उनले बताए । आफूसँगै आएका विराटनगरका साथीलाई पनि जानकारी गराइसकेको र उनी पनि अस्पतालको अस्पर्कमा रहेको उनले बताए ।
