काठमाडौँ । अखिल नेपाल जनजाति सम्मेलनले कोरोना भाइरसको सङ्क्रमण विरुद्ध साझा एकता कायम गर्नुपर्ने आवश्यकतामा जोड दिएको छ । कोरोना महामारी विचारको आधारमा पक्षविपक्ष, मत–मतान्तर र बाझाबाझको विषय नभएको बताउँदै सम्मेलनले साझा एकतामा जोड दिएको हो ।
जनजाति सम्मेलनका अध्यक्ष निमबहादुर बुढाथोकीको हस्ताक्षरमा २०७६ चैत्र १५ गते जारी प्रेस वक्तव्यमा सो आवश्यकतामाथि जोड दिइएको छ । “यो बिपत्को घडीमा आपसी एकता, सद्भाव, उच्च अनुशासन कायम गर्न सबैसित हार्दिक अपिल गर्दछ” वक्तव्यमा अगाडि भनिएको छ–
“कोभिड–१९ (कोरोना भाइरस) बाट सिङ्गो विश्व अहिले सङ्कटग्रस्त छ । चीनको वुहान प्रान्तबाट सुरु भएको यो सङ्क्रामक रोग अहिलेसम्म संसारको अधिकांश देशमा फैलिइसकेको छ । कैयौँ देशले रोगलाई फैलिन नदिन र नियन्त्रण गर्न लकडाउनको विधि अपनाएका छन् । लकडाउन प्रभावकारी हुन नसकेपछि कतिपय ठाउँमा कफ्र्यु लगाउनुपरेको छ । यस रोगबाट आजसम्म २७ हजारभन्दा बढी मानिसको मृत्यु भइसकेको छ । छ लाखभन्दा बढी मानिस यस रोगबाट सङ्क्रमित भएका छन् र डेढ लाखजति मानिस उपचारपछि घर फर्किएका छन् । रोक्न प्रयत्न गर्दागर्दै पनि खडेरीमा डढेलो लागे झैँ कोरोना भाइरसको सङ्क्रमण बढिरहेको छ ।
आजसम्मको रेकर्डअनुसार बेलायतमा बस्दै आएका एकजना भूतपूर्व गोर्खा सैनिकको लन्डनमा र पाँचथर जिल्लाबाट अमेरिका गएका अर्का व्यक्तिको अमेरिकामै गरी जम्मा दुई जना नेपालीको प्रवासमा यस रोगबाट मृत्यु भएको छ । नेपालभित्र अझैसम्म कसैको मृत्यु भएको छैन । तर विदेशबाट आएका चार जनामा सङ्क्रण भेटिएको छ । नेपालमै पनि सङ्क्रमितको सङ्ख्या कति पुग्ने हो ? अहिले नै भन्न सक्ने अवस्था छैन । विभिन्न राजनीतिक तथा सामाजिक विषयमा पक्षविपक्ष, मत–मतान्तर हुन्छ । तर यो पक्षविपक्षमा बाँडिने र मत बाझाबाझ गर्ने विषय हैन । सरकार र नागरिक, पक्षविपक्ष राजनीतिक शक्ति, समग्रमा जनताको एकताबाट नै यो सङ्कटको सामना गर्न सम्भव हुने छ । यस प्रेस वक्तव्यमार्फत् हाम्रो सङ्गठन अखिल नेपाल जनजाति सम्मेलन यो साझा सङ्कटसित जुध्न सबैमा एकता कायम गर्न हार्दिक अनुरोध गर्दछ ।
नेपाल सरकारले चैत्रको पहिलो हप्ताबाटै शिक्षण संस्था बन्द गराएको थियो । चैत्र ९ गतेबाट अत्यावश्यक केही बाहेकका कार्यालय बन्द गरेको छ । सरकारले चैत्र ७ गते नै वक्तव्यमार्फत् चैत्र १० देखि २१ गतेसम्म लामो दुरीका गाडी बन्द गर्ने घोषणा गरेको थियो । सरकारले परिस्थितिको संवेदनशीलतालाई ध्यान दिँदै चैत्र ११ गतेदेखि १८ गतेसम्म नेपालभर लकडाउनको घोषणा गरेको छ । भारत, दक्षिण अफ्रिकालगायत देशले तीन हप्ताका लागि लकडाउन घोषणा गरेका छन् । नेपालले पनि लकडाउनको अवधि बढाउनुपर्ने हुन सक्छ ।
अहिले राष्ट्रिय र अन्तर्राष्ट्रिय हवाइ उडान बन्द गरिएको छ । सीमानाका बन्द गरिएको छ । तर चीनमा कोरोना भाइरसको सङ्क्रमण नियन्त्रण हुँदै गएकाले उत्तरी नाका रसुवागढी र तातोपानी खोल्ने बताइएको छ । सरकारले अत्यावश्यक कामबाहेक घरबाट बाहिर ननिस्कन, समूहमा नहिँड्न, घोषित लकडाउनलाई स्वीकार गर्न,। सकभर एकअर्कामा भेटघाट नगर्न, भेटघाट नै गर्नुपरे पनि निश्चित दुरी कायम गर्न, बेलाबेलामा साबुनपानीले हात धुन, कोरोना भाइरसका लक्षण देखिएमा सम्बन्धित निकायमा सम्पर्क गर्न आह्वान गरेको छ । जारी नियम, सूचना, आह्वान हामी, हाम्रा सन्नति, नातागोता, समग्रमा हामी सबैको हितका लागि हो भन्ने ठानेर उच्च अनुशासनमा बस्नुपर्ने भएको छ । हाम्रो सङ्गठन त्यसका निम्ति सबैसित हार्दिक अनुरोध गर्दछ ।
कोरोना भाइरसको सङ्कट बढ्दै जाँदा कालोबजारीका समस्या पनि बढ्दै छ । अहिले नै कालोबजारीको समस्या देखिने गरेका छन् । कृत्रिम अभाव सृजना गरेर मूल्यवृद्धि गर्ने समस्या बढ्दै जान सक्छ । सरकारले कालोबजारी रोक्न, कठोर कदम चाल्न पनि तयार होस् भन्ने हाम्रो जोडदार आग्रह छ ।
बजारमा मुख्य रूपले खाद्यपदार्थ, इन्धनजस्ता दैनिक प्रयोजनका सामग्रीको अभाव हुन नदिन सरकारले विशेष ध्यान देओस् भन्ने हाम्रो आग्रह छ । ज्यालादारी मजदुरीबाट जीवन निर्वाह गर्ने मजदुर र सर्वसाधारण जनतालाई दैनिकी चलाउन गाह«ो पर्ने भएकाले ती वर्गको बारेमा अविलम्ब सुविधाको कार्यक्रम लागु गरियोस् । सरकारले सात वटै प्रदेशमा कोरोना भाइरसको परीक्षण केन्द्र खडा गर्ने बताए पनि अझैसम्म त्यसो हुन सकिरहेको छैन । त्यो कार्य अविलम्ब पूरा गरियोस् । विदेशबाट आएका मानिसले रोग लिएर आएका हुन सक्छन् । प्रशासन, स्थानीय सङ्घ÷संस्था र स्थानीय जनताले विशेष ध्यान पु¥याउन जरुरी छ । यदि आफ्नो टोल छिमेकमा सङ्क्रामक रोग लागेको ठाउँबाट आएको व्यक्ति भए यसलाई अनिवार्य रूपमा निश्चित अवधि क्वारेन्टाइनमा राख्ने र स्वास्थ्यप्रति सर्तकता अपनाउने गर्नुपर्दछ ।
कोरोना भाइरस सङ्क्रमण सम्बन्धमा चीन र अमेरिकाबाट बेग्लाबेग्लै शिक्षा लिन सकिन्छ । यो सङ्क्रमण चीनबाट सुरु भएको र यसले भयावह रूप लिइसकेको भए पनि उसले त्यहाँका जनतालाई उच्च अनुशासनमा राख्न सकेको र जनतालाई दैनिक उपभोग्य सामग्रीको अभाव पनि हुन नदिएकाले त्यसलाई नियन्त्रण गर्दै जान सफल भएको छ । तर अमेरिकाले सतर्कता नअपनाउँदा स्थिति झन् भयावह बन्दै गएको छ । इटली, स्पेन, इरानमा पनि सुरुमै सतर्कता अपनाउन सकेको भए त्यति ठुलो क्षति बेहोर्नुपर्ने थिएन ।
साम्राज्यवादी देशले एकले अर्कोलाई कमजोर पार्न जैविक हतियारका रूपमा यो भाइरस प्रयोग गर्दा विश्व मानव जगतले यो पीडा भोग्नुपरेको छ भन्ने विचार पनि व्यक्त गरेको पाइन्छ । कतै एकले अर्कोलाई दोषारोपण गरेको पनि पाइन्छ । अमेरिकी साम्राज्यवादले भियतनाम युद्धमा जैविक हतियार प्रयोग गरेको थियो । साम्राज्यवादीहरू प्रकृति र मानवताका विरोधी हुन् । उनीहरू आफना निकृष्ट स्वार्थका निम्ति जे पनि गर्न तयार हुन्छन् । यस पटक यो भाइरसको घटनाबारे गहिरो छानबिन बिना अहिले नै केही भन्नु सम्भव छैन । यदि यो सत्य हो भने विश्व मानव समाजले साम्राज्यवादी अपराधको निन्दा गर्नुपर्दछ ।
अखिल नेपाल जनजाति सम्मेलन एउटा जिम्मेवार सङ्गठन हो । अहिले कोरोना भाइरस प्रकोपका कारण सङ्गठन यो बिपत्को घडीमा आपसी एकता, सद्भाव, उच्च अनुशासन कायम गर्न सबैसित हार्दिक अपिल गर्दछ ।”
