दाङ । लकडाउनको समयमा दैनिक काम गरेर दैनिकी गुजार्ने मजदुरहरुको अवस्था दयनीय भएको भन्दै त्यसतर्फ ध्यान दिन राजमोले आग्रह गरेको छ । राष्ट्रिय जनमोर्चा जिल्ला समिती दाङ देउखुरीले एक विज्ञप्ति प्रकाशित गरी मजदुरहरुको जीवनयापनप्रति सम्वेदनशील रहन सरकारसँग आग्रह गरेको छ ।
जिल्ला अध्यक्ष गणेश आचार्यद्वारा बिहीबार जारी वक्तव्यमा भनिएको छ, ‘रोगका कारण जीवन रक्षामाथिको चुनौती त छँदैछ त्यसका कारणले पैदा गरेको परिस्थितिका कारण दैनिक मजदुरी गरि जिवीकोपार्जन गर्नेहरुको जीवन झनै कस्ट्प्रद बन्दैछ । यसमा सरकार र सम्बन्धित सबै पक्षको ध्यान जान जरुरी छ । र उनीहरुलाई सहयोगको ब्यबस्था मिलाउन जरुरी छ ।’
राजमो दाङले कोरोना फैलने डरले निजी अस्पतालहरुले अन्य बिरामीलाई समेत भर्ना गर्न नमानेको भन्दै ति अस्पतालमाथि कडाई गर्न पनि सरकारसँग माग गरेको छ । यस्तै, लकडाउनको पूर्ण पालना गरी सरकारलाई सहयोग गर्न आह्वान गर्दै राजमोले रोगै लाग्न नदिन तथा शंका लागेमा क्वारेन्टिनमा बस्न र अस्पताल जान पनि सबैसँग आग्रह गरेको छ ।
यसैगरी दाङ जिल्लामा क्रियाशील राजनीतिक दलहरु राजमो, नेपाली कांग्रेस र नेकपाले पनि संयुक्त विज्ञप्ति प्रकाशित गरी कोरोना प्रकोप पीडितहरुको उपचारमा संलग्न चिकित्सकहरुलाई सहयोग गर्ने र जनचेतना फैलाउन संयुक्त पहल गर्ने बताएका छन् ।
दलहरुले स्थानीय तह तथा वडास्तरमा राजनीतिक दलहरुको संयन्त्र निर्माण गरी भारत तथा विदेशबाट आएकाहरुको अभिलेख राख्ने, क्वारेन्टिनमा बसे नबसेको अनुगमन गर्ने, कोरोनासँग मिल्दोजुल्दो लक्षण देखिएमा तत्काल उपचारका लागि तोकिएको स्थानमा पठाउने जनाएका छन् ।
