जनगायक एवं रक्तिम सांस्कृतिक अभियानका सचिव हेमराज आश्रमको सन्देशमूलक गीत ‘बाबा म त पढ्दिन बोर्डिङ, लगि दिनु स्कूल सरकारी’ बोलको गीत सार्वजनिक भएको छ ।
हेमराज आश्रमको शब्द तथा संगीत सिर्जना रहेको गीतलाई नौ वर्षीय बालक सफल परियारले स्वर दिएका छन् । सफल काठमाडौंको पुतलीसडममा रहेको पद्मोदय माविमा अध्ययनरत छात्र हुन् ।
गीतको म्युजिक भिडियोमा गायक आश्रमसहित साहित्यकार एवं कलाकार संगीता थापा र बालिका पिन्जु मगरको अभिनय छ । काठमाडौंको पानीपोखरीस्थित भानु माविमा कक्षा ४ मा अध्ययनरत बालिका पिन्जुले लोभलाग्दो अभिनय गरेकी छन् । पिन्जु पूर्व सभामुख कृष्णबहादुर महराकी नातिनी तथा जनवादी गायीका प्रगति मगरकी छोरी हुन् ।
मधुर बस्नेत र विजय लामाले छायांकन गर्नुभएको म्युजिक भिडियोको सम्पादन नविन निरौलाले गर्नुभएको छ भने निर्देशन आश्रमकै रहेको छ ।
आश्रम म्युजिक प्रालिले प्रस्तुत गरेको भिडियोमा पद्मोदय माविसहित काठमाडौं आसपासको दृष्य देखाइएको छ । गीतले मौलाउँदो शैक्षिक व्यापारिकरणको विरोध गरेको छ भने सरकारी विद्यालयप्रति समूदायको आकर्षण बढाउने प्रयास गरेको छ।
