काठमाडौँ । राष्ट्रिय जनमोर्चाका अध्यक्ष तथा प्रतिनिधिसभाका सांसद चित्रबहादुर केसीले देशलाई ठिक ठाउँमा लैजाने हो भने शिक्षाको जिम्मा राज्यले लिनुपर्ने बताउनुभएको छ ।
२०८० असोज १९ गते शुक्रबार प्रतिनिधिसभाको बैठकमा शिक्षा विधेयक–२०८० बारे धारणा राख्दै उहाँले यस्तो अभिव्यक्ति दिनुभएको हो ।
‘मुलुकको यो दुर्दशा हुनुका पछाडि मुलुकको शिक्षाप्रणालीमा भएको खराबी हो’ उहाँले भन्नुभयो– ‘यदि हामी देशलाई ठिक ठाउँमा लैजान चाहान्छौँ भने शिक्षाको जिम्मेवारी राज्यले लिनुपर्दछ ।’
शिक्षा, स्वास्थ्य, रोजगारीको जिम्मा राज्यले नलिने देशको विकास नभएको प्रसङ्ग जोड्दै अध्यक्ष केसीले नेपालमा शिक्षाको निजीकरण र व्यापारीकरण भएकाले देशको अवस्था गम्भीर भएको बताउनुभयो ।
उहाँले राज्यले नै शिक्षाको निजीकरण र व्यापारीकरणतर्फ जोड दिएको प्रमाण पेस गर्दै भन्नुभयो– ‘हामीले यहाँ त शिक्षाको निजीकरण र व्यापारीकरण गर्नेलाई मन्त्री नै बनाउँछौँ ।’
अहिलेको शिक्षाप्रणालीले विद्यार्थीहरूलाई देशको भूगोल, इतिहास, परम्परा, राष्ट्रियता आदिबारे जानकारी नदिएको बताउँदै उहाँले त्यसैको परिणामस्वरूप विद्यार्थीमाझ ‘देशभित्रै केही हुन्न’ भन्ने मनोविज्ञान विकास भएको बताउनुभयो ।
‘देशमा केही हुन्न भनेपछि कहाँ जाने त ?’ उहाँले भन्नुभयो– ‘त्यसपछि अमेरिका, बेलायत, अस्ट्रेलिया जाने, त्यहाँ पनि सकिएन भने पढ्ने निहुँमा जापान जाने ।’
राज्यको दलीयकरण भयो
अध्यक्ष केसीले राज्यको दलीयकरण भएकाले नै शिक्षालाई स्थानीय तहलाई दिने प्रस्ताव आउँदा लाखौँ शिक्षक आन्दोलनमा उत्रिएको बताउनुभयो ।
‘शिक्षा स्थानीय तहलाई दिऊँभन्दा लाखौँ शिक्षक राजधानीमा आए आन्दोलन गर्न । किन आए उनीहरू ?’ उहाँले भन्नुभयो– ‘किनकि हामीले राज्यको यतिसम्म दलीयकरण गरेका छौँ, शिक्षा स्थानीय तहलाई दिने हो भने आफ्नो दलकालाई मात्र राख्ने, भिन्नमत राख्नेलाई त्यहाँ बसिखान दिन्नन् भनेरै शिक्षकहरू आन्दोलनमा आए ।’
सांसद केसीले सैद्धान्तिक रूपमा शिक्षा निजी क्षेत्रलाई दिनु सही भएको दाबी गर्नुभयो ।
निजामती कर्मचारीसरह सुविधा शिक्षकलाई दिऊँ
मन्तव्यको क्रममा अध्यक्ष केसीले निजामती कर्मचारीलाई जस्तै शिक्षकलाई पनि सेवासुविधा दिनुपर्ने आवश्यकतामा जोड दिनुभयो ।
‘शिक्षकहरूलाई निजामती कर्मचारीसरह सेवासुविधा दिनुपर्दछ’ उहाँले भन्नुभयो– ‘यदि त्यसो गरिएन भने नेपालको शिक्षाप्रणाली यहाँभन्दा पनि खत्तम भएर जान्छ ।
धेरै थरी शिक्षक नबनाऔँ
अध्यक्ष केसीले शिक्षकलाई धेरै थरी तहमा विभाजन गर्ने विषयप्रति विमति राख्नुभयो ।
‘दसौँ थरी शिक्षकहरू छन् । किन चाहियो यति थरीका विभाजन ?’ उहाँले भन्नुभयो– ‘एउटै प्रकारका शिक्षक बनाऔँ शिक्षकहरूमा धेरै तह नबनाऔँ । यसले उनीहरूको माझमा भेदभाव बढ्छ ।’
हतारमा विधेयक पास नगरौँ
सांसद केसीले शिक्षा विधेयकमाथि व्यापक र गम्भीर छलफल हुनुपर्ने आवश्यकता औल्याउनुभयो ।
‘शिक्षा विधेयक आयो, राम्रो भयो’ उहाँले भन्नुभयो– ‘शिक्षा विधेयक नआएको भए त यतिका छलफल नै हुन सक्दैनथ्यो ।’
उहाँले शिक्षा गम्भीर विषय भएकाले यसबारे गम्भीर प्रकारले छलफल गरेर मात्रै शिक्षा विधेयकलाई पास गर्नुपर्ने आवश्यकतामा जोड दिनुभयो ।
