काठमाडौं । अखिल नेपाल किसान महासंघले कोरोना भाइरसको सन्त्रासविरुद्ध सरकारले चालेको कदम प्रभावकारी बन्न नसकेको भन्दै आलोचना गरेको छ । महासंघले सोमबार एक विज्ञप्ति जारी गरी कोरोनाकै बहानामा बजारमा दैनिक उपभोग्य वस्तुको कृत्रिम अभाव सिर्जना गरिएको, कालोबजारी तथा मूल्य वृद्धि गरिएको भन्दै त्यसलाई रोक्न सरकारको गम्भीर ध्यानाकर्षण गरेको छ ।
यस्तै, किसान महासंघले चैत महिनामा सञ्चालन गर्ने तयारी गरिएको संगठनात्मक अभियान तत्कालका लागि स्थगित गर्ने निर्णय गरेको छ । अध्यक्ष भैरवराज रेग्मीको अध्यक्षतामा बसेको सचिवालय बैठकले ‘विभिन्न व्यावहारिक कारण र राजमोको संगठन अभियान चैत्र महिनासम्म निरन्तर चल्ने भएकोले यसलाई सहयोग गर्दै किसान संगठनको अभियान २०७७ भाद्र महिनामा सार्ने निर्णय’ गरेको हो ।
आगामी साउन महिनामा अभियानको आवश्यक तयारीमा लाग्ने र भदौ १ गतेदेखी नै १ महिनासम्म अभियान सञ्चालन गर्ने निर्णय गरिएको अध्यक्ष रेग्मीद्वारा जारी वक्तव्यमा जनाइएको छ ।
यस्तै, महासंघले ४ किसान संगठनद्वारा माग पत्र तयार गरी आन्दोलनमा जाने समझदारी अनुसार अन्य थप किसान संगठनलाई सामेल गरेर अन्तिम थपदिई आन्दोलनको तयारि गर्ने निर्णय गरेको छ ।
