काठमाडौं । प्रगतिशील लेखक सङ्घ केन्द्रीय समितिको आयोजनामा “प्रगतिशील दृष्टिकोणमा लोकसाहित्य” विषयक साठिऔँ परिसंवाद कार्यक्रम सम्पन्न भएको छ ।
कार्यक्रम केन्द्रीय अध्यक्ष डा. मधुसुदन गिरीको अध्यक्षतामा २०७९ माघ ७ गते शुक्रबार सङ्घको केन्द्रीय कार्यालयमा सम्पन्न भएको हो ।
कार्यक्रममा बोल्दै प्रलेसका पूर्व अध्यक्ष तथा सल्लाहकार प्रा.डा. जीवेन्द्र देव गिरीले ‘लोकसाहित्यमा ठुलो भण्डार भएकाले त्यसको संयोजन गर्दै प्रगतिशील साहित्यले आफ्नो भूमिका निर्धारण गर्नुपर्ने बताउनुभएको थियो । उहाँले, ‘सामाजिक, भौतिक परिवेशअनुसार नै लोकसाहित्यले आफूलाई परिमार्जन गर्दै लगेको भन्नुभएको थियो ।
गिरीले मानिसले जीवनसँग सङ्घर्ष गर्दै तथा उत्पादनसँग जोडिदै जाँदा लोकसाहित्यको उत्पति भएको बताउँदै चिन्तनलाई यथास्थितिबाट माथि उठाउन लोकसाहित्यको वैज्ञानिक अध्ययन तथा अनुसन्धान आवश्यक रहेको र लोकगीत, लोकनाटक, उखान, लोक कविता, लोक गाथा, टुक्का, गाउँखाने कथा, मन्त्र, लोककाव्य आदि लोकसाहित्यको विधा भएको प्रा.डा. गिरीले बताउनुभयो ।
माक्र्सले समेत लोकसाहित्यको क्रान्तिकारी उपयोग गर्नुपर्ने बताउनु भएको चर्चा गर्दै गिरीले ‘साहित्य सिर्जनामा लोकसाहित्यको ठूलो भूमिका हुने गोर्कीको मान्यता रहेको’ र ‘लोकसाहित्यको प्रयोगले मुनामदन चर्चित भएको समेत गिरीको तर्क थियो ।
परिसंवाद कार्यक्रममा पूरक टिप्पणी गर्नेहरूमा गोपीरमण उपाध्याय, प्रा.डा. ध्रुवकुमार घिमिरे, प्रा.डा. ईश्वरचन्द्र ज्ञवाली, डा. बालाकृष्ण अधिकारी, समीर सिंह, शशिराम कार्की, आभासेतु सिंह, बिजुला रायमाझी, नन्दू उप्रेती, चतुर्भुज केवरत, नर्मदेश्वरी सत्याल हुनुहुन्थ्यो ।
उपाध्यक्ष नमुना गिरीको संचालनबाट अगाडि बढेको सो परिसंवाद कार्यक्रमको विषयवस्तुको बारेमा संयोजक समीर सिंहले प्रष्टयाउनुभएको थियो ।
