काठमाडौँ । क्यान्सर रोगसँग सङ्घर्षरत बिरामीलाई कुण्डलिनी डायग्नोसिस सेन्टर, चण्डोल (काठमाडौँ) मा उपचार गराउँदा विशेष सहुलियत प्राप्त हुने भएको छ ।
नेपाल क्यान्सर सर्भाइबर सोसाइटीकी अध्यक्ष प्रमिता खनाल र कुण्डलिनी डाइग्नोसिस सेन्टरकी म्यानेजिङ डाइरेक्टर नीलु श्रेष्ठबिच भएको सम्झौताअनुसार यस प्रकारको सुविधा प्राप्त हुने भएको हो ।
कुण्डलिनी सेन्टरमा अल्ट्रसाउन्ड (भिडियो एक्सरे), एमआरआई, सिटीस्क्यान तथा विभिन्न परिक्षणहरूमा सुविधाप्राप्त गर्न चिकित्सकको सिफारिसका साथै नेपाल क्यान्सर सर्भाइबर सोसाइटीको पत्र लिएर जानुपर्ने संस्थाकी कोषाध्यक्षले बिनु केसीले बताउनुभयो ।
सम्झौतापत्रमा संस्थाकी सचिव प्रमिला केसी तथा कोषाध्यक्ष बिनु केसीसमेत साक्षी रहनुभएको छ ।
क्यान्सरका बिरामीलाई यस्तै प्रकारको सुविधा तीनकुनेस्थित मेट्रो आँखा अस्पताल र समाज डेन्टल हस्पिटलमा समेत उपलब्ध हुँदै आएको छ ।
स्मरण रहोस्, नेपाल क्यान्सर सर्भाइबर सोसाइटीले गत लामो समयदेखि क्यान्सरसँग सङ्घर्षरतलाई आवश्यक काउन्सिलिङ, आर्थिक सहयोग, विभिन्न समूहमा क्याम्प, स्कुलस्तरीय जनचेतनामूलक कार्यक्रमलगायत विभिन्न प्रकारका सहयोग गर्दै आइरहेको छ ।
