बुटवल । प्रगतिशील लेखक संघ नेपाल, रुपन्देहीको नवौं जिल्ला सम्मेलन बुटवलमा सम्पन्न भएको छ। शनिबार सम्पन्न सम्मेलनले कविराज पौडल अध्यक्ष रहेको १५ सदस्यी नयाँ कार्य समिति गठन गरेको छ।
सर्वसम्मत रुपमा चयन भएको समितिको उपाध्यक्षमा श्यामलाल पोखरेल, ह्दय लेकाली, यज्ञप्रसाद न्यौपाने, सचिव कृष्ण गाउँले, सहसचिव सीता काफ्ले, कोषाध्यक्ष हिरालाल धामी रहनुभएको छ । त्यस्तै सदस्यहरुमा टेकराज भुसाल, माधवप्रसाद पौडेल, गणेश घिमिरे, होमराज भुसाल, दीपक न्यौपाने, यज्ञलाल सुवेदी, सिर्जना खनाल र गीतारानी बराल रहनुभएको छ ।
यसअघि आयोजित कार्यक्रममा बोल्दै लेखक तथा साहित्यकारहरुले संगठित रुपमा प्रगतिशील लेखक संघले राजनीतिक दलहरुलाई सही बाटो हिँडाउन खबरदारी गर्न सुझाव दिएका थिए ।
कार्यक्रमका प्रमुख अतिथि प्राध्यापक डा. कपिलदेव लामिछानेले समाज परिवर्तका लागि राजनीतिक परिवर्तनले मात्र नहुने भएकाले सांस्कृतिक जागरणका लागि प्रगतिवादी आन्दोलन आवश्यक पर्ने बताउनुभयो ।
कविबर रामचन्द्र भट्टराइले भू–राजनीतिक दृष्टिकोणले नेपाल संगीन घडीमा रहेको उल्लेख गर्दै देशलाई युक्रेन जस्तै भूमरीमा फसाउने षडयन्त्र भैरहेको बताउनुभयो । बिना श्रीपेचका राजाहरु घासमा लुकेका हरिया सांप जस्तै सलबलाएको भन्दै खबरदारी आवश्यक रहेकोमा जोड दिनुभयो ।
प्राज्ञ बुंद रानाले पार्टीका नेताहरुलाई पथपर्दशक बाटो हिँडाउनका लागि लेखक, साहित्यकारहरुले खबरदारी गर्नुपर्ने बताउनुभयो । उहाँले एमसीसी परियोजनाबारे प्रगतिशील लेखक संघ बोल्न नसकेकोप्रति आलोचना गर्नुभयो।
कार्यक्रममा प्रगतिशील लेखक संघ रुपन्देहीका पूर्व अध्यक्ष डा. मुरारी पराजुली, देवेन्द्र घिमिरे, राष्ट्रिय जनमोर्चाका नेता दुर्गानाथ खरेल, नेकपा एमालेका शोभारखर पोखरेल, नेकपा माओवादी केन्द्रका सुदीप न्यौपाने, नेकपा एकीकृत समाजवादीका सिद्विचरण भट्टराई लगायतले आआफ्ना भनाइ राख्नुभएको थियो ।
अध्यक्ष दलबहादुर गुरुङको अध्यक्षता, सचिव श्यामलाल पोखरेलको सञ्चालन र उपाध्यक्ष कविराज पौडेलको स्वागतमा कार्यक्रम भएको थियो ।
