काठमाडौँ । पछिल्लो २४ घण्टामा देशभर १,२०५ जना निको हुँदा ३८८ जनामा कोरोना सङ्क्रमणका नयाँ बिरामी थपिएका छन् ।

स्वास्थ्य तथा जनसङ्ख्या मन्त्रालयका अनुसार ८ हजार १४० जनामा गरिएको नमूना परीक्षणमा ३८८ जनामा सङ्क्रमण पुष्टि भएको हो ।

यससँगै देशभर कोरोना सङ्क्रमितको कुल सङ्ख्या एन्टिजेन विधिबाट भएको परीक्षणमा १ लाख ३८ हजार ७३८ र पी.सी.आर. विधिबाट भएको परीक्षणमा ९ लाख ७५ हजार ८०६ जना पुगेको छ । सङ्क्रमितमध्ये हालसम्म ९ लाख ५२ हजार ५९९ जना निको भइसकेका छन् ।

त्यस्तै, पछिल्लो २४ घण्टामा ४ जनाको मृत्यु भएसँगै मृतकको कुल सङ्ख्या ११ हजार ९२५ पुगेको छ ।

हाल देशभर कोरोनाका सक्रिय सङ्क्रमित ११ हजार २८२ जना रहेको मन्त्रालयले जनाएको छ ।