काठमाडौं । सुनसरीको कोसी गाउँपालिकाको हरिपुरमा ट्रकसँग एम्बुलेन्स ठोक्किँदा ६ जनाको मृत्यु भएको छ ।
विराटनगरको गोल्डेन अस्पतालमा उपचारका क्रममा मृत्यु भएकी शिवमाया राईको शव बोकेर उदयपुर आउँदै गरेको ना १ च ९३६४ नम्बरको एम्बुलेन्स र ना २ ख ९०८२ नम्बरको ट्रक शनिबार राति आपसमा ठोक्किएका हुन्।
प्रहरीका अनुसार घटनास्थलमा प्रहरी पुग्दा एम्बुलेन्सभित्र ७ वटा शव थिए। तीमध्ये एकजना शिवमाया राईको उपचारका क्रममा पहिल्यै मृत्यु भइसकेकाले एम्बुलेन्समा रहेका ६ जनाको मुत्यु भएको उनले बताए ।
दुर्घटनामा एम्बुलेन्स चालक २८ वर्षीय, राजेश दनुवार, वर्ष ३४ का दुर्गाधन राई, २८ का टेकेन्द्र राई, ५० को तुलबहादुर राई, वर्ष ३१ को दिनेश राई र वर्ष ३५ मुकेश राईको मृत्यु भएको प्रहरीले जनाएको छ।
सबै शव सुनसरी सदरमुकामस्थित इनरुवा अस्पतालमा लगिएको प्रहरीले जानकारी दिएको छ । उनीहरु सबै एउटै परिवारका हुन सक्ने प्रहरीको अनुमान छ ।
बाक्लो हुस्सुका कारण ट्रकसँग एम्बुलेन्स ठोक्किएको हुनसक्ने प्रहरीले जनाएको छ । तराईमा जाडोयाममा बाक्लो हुस्सु लाग्दा नजिकैसमेत देख्न मुस्किल पर्छ ।
