काठमाडौं । पछिल्लो २४ घण्टामा नेपालमा ६ हजार ८२७ जनामा कोरोना भाइरस संक्रमण पुष्टि भएको छ।
१९ हजार ८६९ वटा नमुना परीक्षण गर्दा सो संख्यामा संक्रमित फेला परेको स्वास्थ्य तथा जनसंख्या मन्त्रालयले जनाएको छ।
आज १० जनाको मृत्यु भएको मन्त्रालयले जनाएको छ। सोही अवधिमा निको हुनेको संख्या ५ हजार ४३२ जना रहेको छ।
यससँगै देशभर कोरोनाको सक्रिय संक्रमितको संख्या ८९ हजार ९४१ जना कायम भएको छ।
बिहीबार देशभर ८ हजार १७ जनामा संक्रमण पुष्टि भएको थियो। संक्रमितमध्ये हालसम्म ८ लाख ४२ हजार ४३६ जना निको हुँदा कुल ११ हजार ६९७ जना संक्रमितको मृत्यु भएको मन्त्रालयको तथ्यांकमा उल्लेख छ ।
एक वर्षमा लगाइयो ३ करोड ६ लाख खोप
नेपालमा एक वषएको अवधिमा ३ करोड ६ लाख ४ हजार १५२ डोज खोप लगाइएको छ। गत वर्ष आजकै दिन अर्थात माघ १४ गतेबाट नेपालमा कोरोना संक्रमणविरुद्ध खोप लगाउन सुरु गरिएको थियो।
हालसम्म ४ करोड २० हजार ४९ हजार ६४० खोप प्राप्त भएको स्वास्थ्य तथा जनसंख्या मन्त्रालयले जनाएको छ।
मन्त्रालयका अनुसार १८ वर्षमाथिका ७० प्रतिशतले पूर्णमात्रा खोप लगाएका छन् भने ८३ प्रतिशतले कम्तीमा एक मात्रा खोप लगाएका छन्।
यस्तै, १२ देखि १७ वर्षका १८ लाख ७२ हजार ६७० जनाले पहिलो मात्रा र ३ लाख ५८ हजार २९८ ले पूर्ण मात्रा खोप लगाएको मन्त्रालयले जनाएको छ। पछिल्लो समय अग्रपंक्तिमा खटिने ३ लाखलाई बुस्टर डोज लगाइएको छ।
