काठमाडौं । नेपाल प्रहरीले १३ औं दक्षिण एशियाली खेलकुद प्रतियोगिता सागको सुरक्षा व्यवस्था चुस्त बनाइएको बताएको छ । बिहिबार काठमाडौँमा आयोजित पत्रकार सम्मेलनमा प्रहरी महानिरीक्षक (आईजीपी) सर्वेन्द्र खनालले सागको सुरक्षा व्यवस्था मजबुत रहेको बताए । खेलका लागि आवश्यक सुरक्षाको पूर्व तयारी र व्यवस्थापनकोसबै काम सकिएको पनि बताए ।
यस्तै सागका बेला ट्राफिक व्यवस्थापन सहज बनाउन सवारीसाधनमा जोर–बिजोर प्रणाली लागू गरिएको पनि नेपाल प्रहरीले बताएको छ । जसअनुसार मंसिर १५ गते बिजोर र मंसिर २४ गते जोर नम्बरको सवारी साधन चलाउन पर्ने छ ।
यस्तै, उद्घााटन र समापनका बेला रंगशालामा खेल हेर्न आउने सर्वसाधारणका लागि पार्किङको व्यवस्था टुँडिखेलमा गरिएको छ । साग खेलकुद अवधिभर चक्रपथमा ठूला सवारीसाधन प्रवेश निषेध गरिएको पत्रकार सम्मेलनमा जनकारी दिएको छ ।
यस्तै, साग खेलका लागि राखेपले फुटबल, भलिबल र बास्केटबलमा टिकट प्रणाली गर्ने जनाएको छ । राष्ट्रिय खेलकुद परिषदले यी खेलहरुको टिकटको जिम्मा इसेवालाई दिएको छ । टिकट खरीद गर्दा खेल हेर्ने दर्शकले आफ्नो नाम र मोबाइल नम्बर राखेर आफ्नै मोबाइलमा टिकटको इलेक्ट्रोनिक कपी डाउनलोड गर्न सकिने कम्पनीका सिइओ रोशन लामिछानेले बताए ।
दशरथ रंगशालाको दर्शक क्षमता १५ हजार ९ सय रहे पनि १४ हजार सिटको लागि मात्रै टिकट बिक्री गरिने भएको छ ।
