मेघराज रिष्मेली, जापान ।
जापान नेपाली एकता समाजले मिर्गौला पीडितलाई आर्थिक सहयोग गरेको छ । बागलुङ जिल्लाको काठेखोला गाउॅंपालिका–५ बिहुंकोटकी ४७ वर्षीया कल्पना क्षेत्रीलाई समाजले १ लाख २५ हजार २७५ रुपैयाँ सहयोग गरेको हो ।
क्षेत्री दुवै मिर्गौला फेल भएर लामो समयदेखि काठमाडौंको त्रिवि शिक्षण अस्पतालमा उपचारत हुनुहुन्छ । उपचार सहयोगको लागि एकता समाजले पहल गरी सो रकम संकलन गरेको हो । संकलित रकम मंगलबार एक कार्यक्रम गरी उहाँलाई हस्तातरण गरिएको हो ।
जापान नेपाली एकता समाजका वरिष्ठ उपाध्यक्ष भीम केसीले पीडितका श्रीमान धन बहादुर क्षेत्रीलाई अस्पतालमै पुगेर रकम हस्तान्तरण गर्नुभएको थियो ।
कार्यक्रममा एकता समाजका पूर्वमहासचि तुफान केसी, अखिल नेपाल महिला संघकी अध्यक्ष मिना पुन, संघकी केन्द्रीय कोषाध्यक्ष तथा राष्ट्रिय जनमोर्चा काठमाडौं महानगरकी अध्यक्ष ऋतु केसी र महिला संघ बागमती प्रदेश अध्यक्ष कमला पौडेल उपस्थित हुनुहुन्थ्यो ।
पीडित कल्पना क्षेत्रीको आर्थिक अवस्था निकै कमजोर भएकोले आफन्तले जापान स्थित जापान नेपाली एकता समाजलाई आर्थिक सहयोग गरिदिन आग्रह गरेका थिए ।
एकता समाजले जापानमा रहेका नेपालीहरूसँग अभियान सञ्चालन गरि रकम पठाएको एकता समाजका केन्द्रीय सचिव गोपाल सापकोटा (गोबिन्द) ले युगदर्शनलाई जानकारी दिनु भयो।
