अर्घाखाँची । अर्घाखाँचीको नरपानीमा बुधबार भएको यात्रु वाहक बस दुर्घटनामा परि मृत्यु हुनेको संख्या १९ पुगेको छ । घटनामा १८ जना घाइते भएका छन् ।
सन्धिखर्कबाट दिउसो १ः३० बजे बुटवलका लागि छुटेको पश्चिम नेपाल बस व्यबसायि प्रालीको लु.२ ख २१४८ नम्बरको यात्रुबाहक बस सन्धिखर्क –६ नरपानी स्थित रातामाटाको भिरमा दिउसो ३ः ५५ बजेको समयमा दुर्घटनामा परेको हो ।
दुर्घटनामा परि मृत्यु हुने १९ जना मध्ये अहिलेसम्म १० जनाको सनाखत भएको जिल्ला प्रहरी कार्यालय अर्घाखाँचीले जनाएको छ । जसमा सन्धिखर्क–७ डिहिडांडा बस्ने वर्ष ५६ का शिवलाल भट्टराई, सोही ठाउँकै वर्ष २२ कि माया पुरी, यस्तै डिहिडांडाकै वर्ष ५४ का बलराम भट्टराई, कपिलवस्तुको चपरगाउँ बस्ने वर्ष २७ कि सिता बस्नेत, सन्धिखर्क–७ खाँचीकोटकै अन्दाजी ९ बर्षकी मोनिका खड्का, रुपन्देहीमा कार्यरत गुल्मी धुर्कोट–२ बस्ने सशस्त्र प्रहरी जवान राज कुमार महत, सन्धिखर्क–१० बस्ने छवीलाल गैरे र दुर्घटनाग्रस्त बसका चालक कपिलवस्तु बस्ने ३५ का बसन्त भन्ने ओम बहादुर थापाको घटनास्थलमै ज्यान गएको जिल्ला प्रहरी कार्यालय अर्घाखाँचीका सुचना अधिकारी प्रहरी निरिक्षक प्रकाश खत्रीले जानकारी दिएका छन् ।
यस्तै दुर्घटनामा घाइते भएका भुमिकास्थान–९ ठुलोडेवा बस्ने वर्ष २७ का शैलेस थापा र गाडी धनी शितगंगा २ बस्ने बर्ष ३८ का सन्त बहादुर बस्नेतको उपचारको क्रममा ज्यान गएको प्रहरीले बताएको छ ।
दुर्घटनामा ज्यान गुमाउने अन्य ९ जनाको अझै सनाखत हुन बाँकी छ । यस्तै दुर्घटनामा परि घाइते भएका १८ जना मध्ये दाङको राप्ति–९ बस्ने वर्ष ३३ का प्रशान्त सुबेदीको अवस्था गम्भीर भएको बुझिएको छ । उनको टाउकोमा गम्भीर चोट लागेकोले लुम्बिनी सिटी हस्पिटल रुपन्देहीमा उपचार हुन नसकेपछि बिएण्डबि हस्पिटल काठमाडौं रिफर गरिएको प्रहरीले जानकारी गराएको छ ।
बस सडकबाट झन्डै ३ सय मिटर तल भिरमा खसेको र दुर्घटनाको कारण नखुलेको र अनुसन्धान जारि रहेको बताइएको छ ।
