काठमाडौँ । नेपालमा हाल २४ जनामा ओमिक्रोन भेरियन्टको सङ्क्रमण पुष्टि भएको छ । शुक्रबार स्वास्थ्य तथा जनसङ्ख्या मन्त्रलायले नेपालमा पछिल्लो समय २४ जनामा ओमिक्रोन सङ्क्रमण पुष्टि भएको जनाएको छ ।
मन्त्रालयका अनुसार पुस सुरु भएयता हालसम्म सङ्कलित ११४६ पोजेटिभ नमुनाहरूको एस जिन स्क्रिनिङ गर्दा २५० ओटामा नमुनामा एस जिन नेगेटिभ पत्ता लागेको छ ।
एस जिन नेगेटिभ पत्ता लागेकामध्ये २४ ओटा नमुनाहरूको जीन सिक्वेन्सिङ गर्दा सबै नमुनामा ओमिक्रोन भेरियन्ट पत्ता लागेको मन्त्रालयका प्रवक्ता डा. सङ्गीता कौशल मिश्राले जानकारी दिनुभएको छ ।
मिश्राले ओमिक्रोन भेरियन्टबाट हुन सक्ने बिरामीको अत्यधिक चापलाई ख्याल गर्दै सबै अस्पताललाई उच्च तयारी अवस्थामा रहन निर्देशन दिएको पनि बताउनुभएको छ ।
मन्त्रालयले आवश्यक उपकरण र अक्सिजनसहितका अत्यावश्यक सामग्री तयारी अवस्थामा राख्न पनि देशभरका अस्पताललाई सर्कुलर गरेको छ ।
