काठमाडौं । अवैधरुपमा ग्रिस जाने क्रममा दुर्घटना हुँदा चार जना नेपालीको ज्यान गएको छ । एक महिना अघिको उक्ता सडक दुर्घटनामा निधन भएका चारै जनाको हाल सनाखत भएको हो ।
ज्यान गुमाउनेमा भीमेश्वर नगरपालिका–६ दोलखाका राजु लामा, आमा छोडिङ्मो गाउँपालिका(३ की रमिला घले, घिरिङ गाउँपालिका–५ तनहुँका उम बहादुर थापा र गौरीगंगा गाउँपालिका–४ कैलालीका लक्ष्मण सापकोटा छन्।
गैह्रकानूनी रुपमा टर्की हुँदै ग्रिस प्रवेश गर्न खोजेका ती नेपालीको गाडी दुर्घटनामा ज्यान गएको थियो।
घटनामा अन्य दुईजना पनि नेपाली घाइते भएका थिए । घाइते हुनेमा भीमेश्वर नगरपालिका–९, दोलखाका मनु लामा र गौरीगंगा नगरपालिका-४ कैलालीका लोकराज आचार्य थिए । उनीहरु अहिले ग्रिसमै छन्।
ग्रिससमेत हेर्ने जिम्मेवारी पाएको अष्ट्रियाको भियनास्थित नेपाली नियोगका द्वितीय सचिव धनञ्जय मेहताका अनुसार मंगलबार मृतक सबै नेपालीको सनाखत भएको हो। नेपालीको मृत्यु भएको सार्वजनिक भएपनि सनाखत हुन सकेको थिएन ।
ग्रिसका सञ्चारमाध्यमले स्थानीय प्रहरी अधिकारीलाई उद्धृत गर्दै जनाएअनुसार नोभेम्बर १९ को मध्यराति तीव्र गतिमा रहेको गाडीका चालकले नियन्त्रण गुमाउँदा टर्कीको सीमाक्षेत्रस्थित राजमार्गमा दुर्घटना भएको थियो । त्यसक्रममा सातजनाको मृत्यु भएको थियो।
गाडीमा १५ जना सवार थिए । सीमा जोडिएको टर्कीबाट गैह्रकानूनी रुपमा ती यात्रु ग्रिस प्रवेश गर्दै थिए । घाइते हुनेमा पाकिस्तानका चार जना, एक अफगानी, दुई नेपाली र एक मोल्दोभन चालक थिए।
