काठमाडौं । मूल प्रवाह अखिल भारत नेपाली एकता समाजका संस्थापक उपसभापति रामचन्द्र पौडेलको निधन भएको छ । चितवन जिल्लाको कालिकानगर नगरपालिका–५ पदमपुर निवासी पौडेलको उपचारका क्रममा शुक्रबार बिहान भरतपुर अस्पतालमा निधन भएको हो ।
उहाँ लामो समयदेखि क्यान्सर रोगबाट पीडित हुनुहुन्थ्यो ।
तत्कालिन अखिल भारत नेपाली एकता समाजका संस्थापक उपसभापति रहेका पौडेल तेस्रो अखिल भारत नेपाली सम्मेलनबाट महासचिव निर्वाचित हुनुभएको थियो ।
बागलुङ जिल्लाको बरेङ गाउँपालिका–१ सिमलपाटाबाट उहाँको परिवार चितवन बसाईं सरेको हो । हाल माओवादी केन्द्रका केन्द्रीय सल्लाहकार रहेका पौडेलको दुई छोरा र एक छोरी छन् ।
पौडेलको निधनप्रति मूल प्रवाह अखिल भारत नेपाली एकता समाजले दुःख व्यक्त गरेको छ । मूल प्रवाह दक्षिण भारत नेपाली एकता समाजका अध्यक्ष चन्द्रबहादुर थापा र सचिव जनकराज पौडेलले शोक विज्ञप्ति प्रकाशित गरी संस्थापक पौडेलप्रति श्रद्धाञ्जली अर्पण गर्नुभएको छ ।
