नयाँ दिल्ली । मूल प्रवाह अखिल भारत नेपाली एकता समाज एलुरू नगर समितिका सल्लाहकार विन्दु आलेमगरको दुर्घटनामा निधन भएको छ । ४० वर्षीय आले मगरको घरको छतबाट खसेर निधन भएको हो
गएको १३ अक्टोबरका दिन छतबाट खसेका मगरको आन्ध्रा हस्पिटल एलुरूमा उपचारका क्रममा ८ नोभेम्बरमा मृत्यु भएको मूल प्रवाहले जनाएको छ ।
उहाँ आन्ध्र प्रदेश पश्चिम गोदावरी जिल्ला अन्तर्गत कालाचरी स्थित एक घरमा करिब ६,७ वर्षदेखि चौकिदारको रुपमा कार्यरत रहनुभएको थियो । सामान लिन घरको तेस्रो तलामा जाने क्रममा चिप्लिएर खस्नु लड्नुभएको थियो । सोही स्थानमा कार्यरत मजदुरहरुले उहाँको तत्काल उद्दार गरी एलुरूस्थित आन्ध्रा हस्पिटलमा भर्ना गरिएको थियो ।
चेकजाँचका क्रममा उहाँको मस्तिष्कमा रगत जमेको, मुटुमा समस्या र देब्रे हात भाँचिएको पाइएको थियो । त्यसपछि उहाँका भाइ धन बहादुर आले र मूल प्रवाह अखिल भारत नेपाली एकता समाज एलुरू नगर समितिका पूर्वअध्यक्ष नरेन्द्र बहादुर पुनको सल्लाहमा अप्रेसन गरिएको थियो । तर, स्वास्थ्य अवस्था खराब हुँदै गएर उहाँको ज्यान गएको हो ।
पाल्पा जिल्लाको तानसेन नगरपालिका वडा नं १० तेल्घा घर भएका आलेका ३ छोरी छन् । मूल प्रवाहको पहलपछि छोरीहरूको पढाइका लागि घरमालिकले केही रकम सहयोग गर्ने आस्वासन दिएको मूल प्रवाहले जनाएको छ ।
मृतक आलेमगरप्रति मूल प्रवाह अखिल भारत नेपाली एकता समाज एलुरू नगर समितिले हार्दिक श्रद्धाञ्जली अर्पण गरेको छ । मूल प्रवाहले एक इमान्दार, सहयोगी र मिलनसार कार्यकर्ता गुमाएको भन्दै उहाँले निधनले मूल प्रवाहलाई ठूलो क्षति पुगेको जनाएको छ ।
