काठमाडौं । भारतको सिलोङमा मजदुरी गर्न गएका १८ जना नेपाली लखेटिएका छन् । बागलुङ र आसपासका क्षेत्रका ती नेपालीलाई स्थानीय खासी स्टुडेन्ट युनियन (केएसयू) ले काम गर्न नदिएर भगाएको हो ।
सो संगठनले नेपालीको वर्कपर्मिट नभएको भन्दै झोलासमेत लिन नदिएर बस चढाएर नेपाल फर्काएको मूल प्रवाह अखिल भारत नेपाली एकता समाजका उपाध्यक्ष कपिल खनालले बताउनुभयो । उहाँका अनुसार ती नेपालीलाई स्थानीय संघ संस्था र एकता समाजको कार्यालयमा समेत सम्पर्क गर्न दिइएको थिएन ।
‘सिलोङको जुवाई भन्ने स्थानबाट १८/२० नेपालीलाई वर्क पर्मिट नभएको भन्दै केएसयूले गुहावटीतर्फ पठाएको रहेछ’ उपाध्यक्ष खनालले भन्नुभयो, ‘त्यसबारेमा हाम्रा साथीहरुले स्थानीय प्रहरीसँग सम्पर्क गर्दा प्रहरीले समेत वर्कपर्मिट नभएकालाई केही गर्न नसकिने जवाफ दिएको छ ।’
झोलासमेत भिर्न नदिएर गुहावटीतर्फ पठाइएका ती नेपाली भने उता नगएर नेपाल फर्किएको जानकारी प्राप्त भएको छ । उनीहरुसँग मूल प्रवाहले सम्पर्क गर्ने प्रयास गरिरहेको समाजका उपाध्यक्ष खनालले बताउनुभयो ।
यसैबीच मूल प्रवाह अखिल भारत नेपाली एकता समाज पूर्वोत्तर क्षेत्रीय समितिले वर्कपर्मिट नभएको भन्दै नेपालीलाई लखेटिएको घटनाप्रति आपत्ति जनाएको छ । समाजका सचिव कृष्ण क्षेत्रीले एक विज्ञप्ति प्रकाशित गरी नेपालीलाई दुःख दिने नियतका साथ लखेटिएको बताउनुभएको छ ।
उहाँले स्थानीय प्रहरी प्रशासनको सहयोगमा विद्यार्थी युनियनले नेपालीलाई भगाएको भन्दै सो घटनाको छानबिन गर्न, उनीहरुका लुटिएका र छुटेका सामान फिर्ता गर्न तथा नेपालीलाई सम्मानका साथ काम गर्ने वातावरण बनाउन भारत सरकारसँग आग्रह गर्नुभएको छ ।
