जापान । रोजगारीको लागि विदेशमा कार्यरत श्रमिक नेपालीलाई स्वदेश फर्कन आह्वान गर्दै जापानमा रहेका रक्तिमका कलाकारहरुले नयाँ गीत सार्वजनिक गरेका छन् । रक्तिम सांस्कृतिक अभियान, जापानका कलाकारहरुको शब्द तथा स्वर रहेको गीतमा विदेशिएका नेपालीलाई स्वदेशमै फर्कन र केही गर्न आह्वान गरिएको छ ।
फर्कौं अब स्वदेशमा हामी
के हुन्छ र विदेशमा बसेर
गरिब दुःखी ए सर्वहारा
उठ अब कम्मरै कसेर…
गीतको शब्द लीला परियारले लेख्नु भएको छ भने संगीत नवीन बस्याले गर्नु भएको छ । गीतमा नवीन बस्याल र पम्फा बञ्जाडेको स्वर रहेको छ । यस्तै, संगीत संयोजन हेमराज आश्रमको रहेको छ । सो गीत गायक तथा संगितकार बस्यालको युटुब च्यानल ‘नविन बस्याल युटुब’ बाट सार्वजनिक गरिएको छ ।
दसैँ तिहार नजिकिँदै गर्दा सार्वजानिक भएको गीतको कथा परदेशिएका नेपालीहरुको कथामा आधारित छ । गीतले नेपालीलाई स्वदेश फर्कन आह्वान गर्दै भनेको छ,
देशभरी कालो बादल असत्यको राज
कहिले होला गरीबको फेरिने समाज
फर्कौं अब सिमाना तरेर
परदेशमा न आउने गरेर….
गीतको रेकर्डिङ काठमाडौं बबरमह स्थित प्रिज्मा डिजिटल स्टुडियो र जापानको सेन्दाई शहरको हारानामाची स्थित ‘फ्युनेल’ स्टूडियोमा भएको जानकारी गायक नवीन बस्याले जानकारी गराउनु भएको छ ।
गीतकार लीला परियार जापान नेपाली एकता समाज अन्तर्गत रक्तिम विभागको अध्यक्ष हुनुहुन्छ भने गायक÷संगीतकार नवीन बस्याल सोही समितिको सहसचिवको रुपमा कार्यरत रहनुभएको छ ।
