धनवीर पुन, नयाँ दिल्ली ।
मूल प्रवाह अखिल भारत नेपाली एकता समाज निमराना नगर समितिका संस्थापक सदस्य चित्रमान पुनको विदाइ भएको छ ।
समाजका महासचिव ठाकुर खनालले संस्थापक पुनलाई एक समारोहबीच दोसल्ला ओढाएर एवं स्मृति पत्र प्रदान गरी सम्मानसहित विदाई गर्नुभएको हो ।
कार्यक्रममा महासचिव खनालसहित मूल प्रवाहका पश्चिमोत्तर क्षेत्रीय सहसचिव इश्वरी आचार्य, पूर्ण भण्डारी, रोम पुन लगायतले शुभकामना दिनु भयो । त्यस क्रममा उहाँहरुले प्रवासमा रोजगारीको दौरान संगठनमा सिकेको अनुभव देशमा जनताको हक हितको रक्षा र मुक्तिको लागि खर्च गर्न आग्रह गर्नुभयो ।
महासचिव खनालले भन्नुभयो, ‘देशका लाखौं युवाहरु रोजगारीका लागि विदेशिन बाध्य छन् । नेपाली जनताले अनेकन आन्दोलनमा महत्त्वपूर्ण भुमिका निर्वाह गरेका छन् तर उनीहरु पटकपटक ठगिएका छन् । देशमा भएका आन्दोलनको पछी बनेका सरकारहले जनताको समस्याहरुको समाधान र स्वदेशमै रोजगारको व्यवस्था गर्न नसक्नाले युवाहरु राष्ट्र निर्माण योगदान दिनबाट बंचित छन् । आमूल परिवर्तनको अभाव नेपाली जनताका समस्या समाधान हुन सक्दैन । भारत प्रवासमा संगठन गर्दा प्राप्त चेतना अनुभवको प्रयोग गरि जनता जगाउने एवं अविचलित रूपमा निरन्तर खटिएको समाचारको संगठन अपेक्षा गर्दछ ।’
महासचिव खनालले थप्नुभयो, ‘देशमा आज जनाआन्दोलनका उपलब्धिहरु संविधान, गणतन्त्र राष्ट्रियता खतरामा छ । गणतन्त्र र राष्ट्रिय स्वाधीनताको लागि आन्दोलन आजको आवश्यकता हो त्यसको लागि राजमोले देशव्यापी आन्दोलन चलाएको छ । भारत प्रवासमा मूल प्रवाहले आन्दोलनलाई अगाडि बढाउँदै आएको छ । तर केही अराजक व्यक्तिहरु संगठनको गर्विलो छविलाई धुमिल पार्ने प्रयत्न गरेका छन् । चर्का नाराको आडमा गणतन्त्रको रक्षा गर्ने दायित्वबाट विमुख भई प्रतिगामी तत्वलाई फाइदा पुर्याइरहेका छन् । संगठनको छविमा आच आउनबाट जोगाउन सबै तह र तप्काका सदस्यले विशेष जोड दिनु पर्छ ।’
खलबहादुर रोकाको अध्यक्षता तथा देवराज पुनको सञ्चालनमा अगाडि बढेको विदाई समारोहमा हुमलाल भण्डारीले स्वागत गर्नु भएको थियो ।
चित्रमान पुन स्वर्गद्वारी नगरपालिका-३, मालारानी प्युठान निवासी हुनुहुन्छ ।
