धनवीर पुन, नयाँदिल्ली ।
मूल प्रवाह अखिल भारत नेपाली एकता समाज दुर्गाबहादुर केसी अध्यक्ष रहेको अन्तर्राष्ट्रिय नेपाली एकता समाजप्रति प्रतिबद्ध रहेको छ ।
समाजका महासचिव ठाकुर खनालले समाजको तर्फबाट २०७८ असोज १२ गते प्रेसवक्तव्य जारी सो जानकारी दिइएको हो ।
महासचिव खनालले वक्तव्यमा फुटपरस्त तत्त्वहरूले कथित भेलाको आयोजना गरेर दुर्गा शर्माको अध्यक्षतामा समिति गठन गरिएकोमा उक्त भेला र समिति दुवैलाई अवैधानिक बताउनुभएको छ ।
यस्तो छ, प्रेसवक्तव्यको पूर्ण पाठ :
“यही मिति २०७८ असोज ११ गते तदनुसार सेप्टेम्बर २७, २०२१ का दिन भर्चुअल माध्यमबाट अन्तर्राष्ट्रिय नेपाली एकता समाजको नाममा कथित छैटौँ भेला सम्पन्न भएको समाचारप्रति हाम्रो गम्भीर ध्यानाकर्षण भएको छ ।
उक्त कथित छैटौँ भेलाबाट समितिमा चयन भएका पदाधिकारी र सदस्यको विवरण हेर्दा सङ्गठनमा फुटपरस्त गतिविधिमा संलग्न व्यक्तिद्वारा नै सो भेला आयोजित थियो भन्ने प्रमाणित हुन्छ । उनीहरूको उदेश्य सकेसम्म सङ्गठनको नेतृत्व कब्जा गर्ने, नसके नीति, नियम, पद्धति, अनुशासनमा नबस्ने, समानान्तर गतिविधि सञ्चालन गर्ने र सङ्गठनमा फुट पार्ने नै हो । सोही योजनानुसार नै अन्तर्राष्ट्रिय नेपाली एकता समाजको नाममा कथित छैटौँ भेला सम्पन्न भएको भन्न सकिन्छ ।
सङ्गठनको नेतृत्व कब्जा गर्ने वा सङ्गठनको सामाजिक सम्पत्ति कब्जा गर्ने चाहना पूरा गर्न फुटपरस्त तत्त्वहरू असमर्थ रहेका छन् । त्यसका साथै उनीहरू देशको राजनीतिक परिदृष्यबाट पनि पूर्ण रूपमा नाङ्गिएर गएका छन् । त्यसबाट हतोत्सायी भएर विभिन्न स्थानमा समानान्तर समिति गठन गर्ने गतिविधिमा घोषित रूपले अगाडि आएका छन् ।
विश्वका विभिन्न देशमा छरिएर रहेका श्रमजीवी नेपालीको अभिभावकीय भूमिका निर्वाह गर्दै आएको छाता सङ्गठन अन्तर्राष्ट्रिय नेपाली एकता समाजमा पनि फुट पार्ने र आफ्नो निहित स्वार्थपूर्ति गर्ने चाहनानुसार नै उनीहरूले सो कथित छैटौँ भेला आयोजना गरेका थिए तर उनीहरूको त्यो चाहाना कदापि पूरा हुने छैन । सङ्गठन विरोधी तत्त्वहरूले चलाएको फुटपरस्त गतिविधिलाई विश्वभरि छरिएर रहेका श्रमजीवीले अविचलित रूपमा सङ्घर्ष गर्दै परास्त गर्ने छन् ।
अन्तमा हामी यो स्पष्ट गर्न चाहन्छौँ कि सङ्गठनको नीति, विधान, पद्धति र अनुशासनका विरुद्ध हुने कुनै पनि प्रकारका कार्यक्रम र गतिविधिप्रति भारत प्रवासमा रहेका श्रमजीवी नेपालीको अभिभावकीय भूमिका निर्वाह गर्दै आएको सङ्गठन मूल प्रवाह अखिल भारत नेपाली एकता समाजको कदापि समर्थन रहने छैन । मूल प्रवाह अखिल भारत नेपाली एकता समाजको सिङ्गो सङ्गठन अध्यक्ष दुर्गाबहादुर केसीको नेतृत्वमा रहेको अन्तर्राष्ट्रिय नेपाली एकता समाजप्रति नै प्रतिबद्ध भएको यसै प्रेसवक्तव्यमार्फत सार्वजनिक गर्दछौँ ।”
