तिलक थापा
बाग्लुङ । नेपाल कम्युनिष्ट पार्टी (नेकपा) र राष्ट्रिय जनमोर्चा सम्मिलित संयुक्त बाम गठबन्धनले शुक्रबार निसीखोला गाऊँपालिकाको वडा नं १ र २ को संयुक्त जनभेटघाट तथा चुनावी सभाको कार्यक्रम निसीखोला–२ खाडुमा सम्पन्न गरेको छ।
संयुक्त निर्वाचन परिचालन समितिका संयोजक सबराज छन्त्यालको अध्यक्षतामा सुरु भएको कार्यक्रममा बोल्दै साझा बाम उमेदवार खिमबिक्रम शाहीले जनताको हरेक सुख दुःखमा आफू हिजो पनि सँगै रहेको भन्दै भोलि पनि सँगै रहने बताउनुभयो । उहाँले टेक बहादुर घर्तीको हरेक सपना पुरा गर्न प्रतिबद्ध रहने बताऊन्दै साझा चुनाव चिन्ह गिलासमा मतदान गरी विजय गराउन अनुरोध गर्नुभयो ।
कार्यक्रममा गण्डकी प्रदेशका सांसद कृष्ण थापाले देशमा प्रतिगामीहरु फेरि सल्वलाईरहेको बेला बामपन्थी उमेदवारलाई विजयी बनाउनुको विकल्प नरहेको बताऊनुभयो । नेकपा नेता सेरमान घर्तीले जनताको एकता भाड्न जति कोशिस गरे पनि त्यो कहिल्यै पुरा नहुने भएकोले त्यो सपना नदेख्न र गिलास चिन्हमा मतदान गरी साझा बाम गठबन्धनको तर्फबाट खिमबिक्रम शाहीलाई विजय बनाऊन अनुरोध गर्नुभयो ।
कार्यक्रममा नेकपा प्रदेश समिती सदस्य प्रेम घर्ती मगर, जिल्ला सदस्य केशर छन्त्याल, निसीखोला गाऊँपालिका अध्यक्ष कुबिर बिश्वकर्मा लगायतका नेताहरुले सम्बोधन गर्नुभएको थियो ।
कार्यक्रममा राजमोका जिल्ला सचिव भिमलाल पोखरेल, अखिल (छैठौं) बागलुङका अध्यक्ष इन्द्रमणी पाण्डे, नेकपा निसीखोला सचिब रुद्र पौडेल लगायतको पनि आतिथ्यता रहेको थियो ।
नेकपा २ नं. वडाका अध्यक्ष इद बहादुर रसाईलीको सञ्चालनमा भएको कार्यक्रममा राजमोका नेता लाल बहादुर सिन्जालीले स्वागत गर्नुभएको थियो । यसै गरि ढोरपाटन नगरपालिका, तमानखोला गाउँपालिकाको विभिन्न वडाहरुमा वडा परिचालन समितिको नेतृत्वमा घरदैलो अभियान सम्पन्न भएको छ । उम्मेदवार सहितको कार्यक्रम भोलि कार्तिक ३० गते बोहरा गाँउमा हुनेछ ।
