खुम रायमाझी, कुवेत ।
कुवेतमा बालुवा र ग्राभेलको थुप्रोमुनि पुरिएर दुई नेपाली नागरिकको मृत्यु भएको छ ।
कुवेतको अन्तर्राष्ट्रिय विमानस्थल टर्मिनल २ को निर्माणको लागि राखिएको संरचनागत बालुवा र ग्राभेलको थुप्रोमा पुरिएर दुई जनाको घटनास्थलमै मृत्यु भएको र एक जनालाई जीवित नै उद्वार गरिएको कुवेतका सञ्चार माध्यमहरुले जनाएका छन् ।
नयाँ विमानस्थल टर्मिनल २ निर्माणकार्यको क्रममा बुधवार साँझ कुवेतको समयअनुसार करिब ६ वजे घटेको उक्त घटनामा मृत्यु हुने दुइजना नेपालको झापा जिल्ला र घाइते हुनेमा पाल्पा जिल्लाका रहेको बताइए पनि पुरा विवरण खुल्न बाँकी छ।
घटनापछि सार्वजनिक निर्माण मन्त्री र सञ्चार तथा सूचना राज्यमन्त्री डा. राना अल फारिसले घटनास्थलमा क्षति विवरणबारे निरीक्षण गरिसकेको कुवेतका प्रख्यात सञ्चार माध्यमहरुले जनाएका छन् ।
घटनाबारे नेपाली राजदूतावास कुवेतका द्वितिय सचिव श्रीकृष्ण सिलवालसँग जिज्ञासा राख्दा घटना भएको खबर सञ्चारमाध्यमबाट थाहा पाए पनि सम्बन्धित कम्पनीसँग सम्पर्क नभएकोले थप विवरण अझै उपलब्ध नभइसकेको बताउनुभयो ।
