प्रकाश थापामगर/गोविन्दकुमार शर्मा
काठमाडौँ । नेकपा (मसाल) का प्रवक्ता रामप्रकाश पुरीले देउवा सरकारलाई सजिलैसँग एमसिसी पारित गर्ने सपना नदेख्न उद्घोष गर्नुभएको छ ।
‘देउवा सरकारले सजिलैसँग एमसिसी पारित गर्ने सपना नदेखे हुन्छ’ उहाँले भन्नुभयो– ‘५५ अरबका लागि देशको सार्वभौमसत्ता बेच्च मिल्दैन ।’
राष्ट्रिय जनमोर्चा काठमाडौँद्वारा राजधानीको शान्तिवाटिकामा २०७८ भदौ २२ गते आयोजित विरोधसभामा मन्तव्य राख्दै प्रवक्ता पुरीले यस्तो उद्घोष गर्नुभएको हो ।
मन्तव्यको क्रममा उहाँले भन्नुभयो– ‘यदि देउवा सरकारले त्यस्तो ग¥यो भने नेपाली जनताले कहिल्यै माथि उठ्न नमिल्ने गरी तल झारिदिने छन् ।’
उहाँले एमसिसी नेपालको राष्ट्रिय स्वाधीनता र सार्वभौमिकताको विरुद्धमा रहेकाले देशैभरिबाट विरोध भइरहेको सरकारलाई स्मरण गराउनुभयो ।
‘एमसिसीको विरोध हामीले मात्रै गरिरहेका छैनौँ’ उहाँले भन्नुभयो– ‘आजै यहीँ राजधानीको विभिन्न स्थानमा र देशैभरि विरोधसभा सम्पन्न भइरहेका छन् ।’
प्रवक्ता पुरीले एमसिसी विरुद्धको आन्दोलन एकल वा संयुक्त रूपमा देशव्यापी रूपमा अगाडि बढाइने जानकारी पनि दिनुभयो ।
अखिल नेपाल महिला सङ्घकी अध्यक्ष मीना पुनले नेपालमा आफ्नै संविधान र ऐनकानुन लागु गर्नबाट बञ्चित गर्ने भएकाले एमसिसी सार्वभौमसत्ता विरोधी परियोजना भएको दाबी गर्नुभयो ।
‘५५ अरब दिएँ भन्दैमा, अझ त्यसमा नेपालले पनि १३ अर्ब मिसाउनुपर्ने’ अध्यक्ष पुनले आश्चर्य व्यक्त गर्नुभयो– ‘अनि, अमेरिकी साम्राज्यवादले नेपाली भूमिमा परेड खेलिरहने ?’
उहाँले सहयोग अनुदान दिने भनेर नेपालको कानुन निष्क्रिय बनाउने, लेखापरीक्षणसमेत नेपालले गर्न नपाउने र बौद्धिक सम्पत्तिमाथि अमेरिकाको अधिकार हुने प्रावधान स्पष्ट रूपमा नेपालको स्वाधीनता र सार्वभौमिकताको विरोधमा रहेको बताउनुभयो ।
चीनलाई कमजोर पार्ने उद्देश्यले एमसिसी अगाडि सारिएको दाबी गर्दै उहाँले भन्नुभयो– ‘यदि एमसिसी पारित गरियो भने नेपाली जनताले शासकलाई धिक्कार्ने छन् र पुनः अर्को आन्दोलन चल्ने छ ।’
कार्यक्रममा मन्तव्य राख्दै राजमो केन्द्रीय सदस्य लालबहादुर थापाले राष्ट्रिय जनमोर्चाले राष्ट्रियता, सार्वभौमिकता, अखण्डता र स्वाधीनताका लागि निरन्तर सङ्घर्ष गर्दै आइरहेको बताउनुभयो ।
एमसिसी विरुद्धको सङ्घर्ष त्यही सङ्घर्षको एउटा सिलसिला भएको पनि उहाँको भनाइ थियो ।
राजमो काठमाडौँका अध्यक्ष झविन्द्र बेलबासेको अध्यक्षता तथा नेकपा (मसाल) काठमाडौँका प्रवक्ता जगत्प्रसाद रेग्मीको सञ्चालनमा सो कार्यक्रम अघि बढेको थियो ।
कार्यक्रममा रक्तिम सांस्कृतिक अभियानले “खबरदार दलालहरू” शीर्षकको गीत प्रस्तुत गरेको थियो ।
