काठमाडौं । बंगलादेशमा भएको पहिलो संस्करणको एभीसी एसियन सेन्ट्रल जोन सिनियर महिला भलिबल च्याम्पियनसिपको उपाधि नेपाली टिमले जितेको छ । पहिलो अन्तर्राष्ट्रिय उपाधि जित्दै नेपाली भलिबलले कीर्तिमान रचेको छ ।
ढाका मिरपुरस्थित शहिद शुरवार्दी इन्डोर हलमा बिहीबार भएको फाइनलमा नेपालले माल्दिभ्सलाई ३–० को सोझो सेटमा पराजित गर्दै नेपाली भलिबल इतिहासमा ऐतिहासिक स्वर्णपदक जितेको हो ।
यो नेपाली भलिबल इतिहासको पहिलो अन्तर्राष्ट्रिय उपाधि हो। यसअघि २०१४ मा काठमाडौंमा आयोजना भएको दक्षिण एसियाली आमन्त्रण महिला भलिबल च्याम्पियनसिपमा नेपालले जितेको रजतपदक नै नेपाली भलिबलको सबैभन्दा ठुलो पदक थियो ।
सेन्ट्रल जोनमा नेपाल अपराजित रहँदै च्याम्पियन बन्यो । माल्दिभ्समाथि पहिलो सेटमा २५–१३ को जित निकालेको नेपालले दोस्रो सेटमा २५–१२ र तेस्रो सेटमा २५–८ सहज जित निकालेको हो । शनिबारबाट शुरु भएको च्याम्पियनसिपमा ५ राष्ट्रको सहभागिता रहेको थियो। राउन्ड रोविन लिगपछि शीर्ष दुई टोली नेपाल र माल्दिभ्सले उपाधिका लागि प्रतिस्पर्धा गरेका थिए।
